Arraignment sa mga kaso ni Joavan wala mahinayon

CEBU, Philippines - Wala mahinayon kagahapon sa buntag ang arraignment unta sa tulo ka kaso nga gipasaka batok ni Joavan, anak ni Talisay City Mayor Socrates Fernandez tungod kay wala motunga ang iyang abogado.

Niadtong Mayo 6 si Joavan nadakpan sa kapolisan sa Talisay City pinasikad sa usa ka bench warrant nga giisyu ni Municipal Trial Court in Cities (MTCC) Judge Mario Manayon tungod kay napakyas kini pagtambong sa iyang kasong physical injury.

Atol sa pagdakop kaniya nakuhaan si Joavan og .9mm calibre nga armas, upat ka bala ug granada. Kini maoy hinungdan nga gipasakaan siya og kasong illegal possession of firearms, violation of Commission on Election (Comelec) gun ban ug illegal possession of explosives. Sa labing unang higayon nakit-an si Joavan nga nagsuot og uniporme sa Cebu Provincial Detention and Rehabilitation Center (CPDRC).

Si Joavan niabot sa korte sa alas 8:30 sa buntag nga gigwardiyahan  sa mga sakop sa CPDRC jail guards.

Matud ni Joavan nga ang iyang abogado dunay appointment sa RTC Barili. Busa mihangyo siya sa korte nga isibog una ang pag -arraign sa tulo niya ka kaso.

Si State Prosecutor Raul Cristoria sa prosekusyon nagkanayon nga wala siya’y nakitang rason nganong dili ihinayon ang pag -arraign sa akusado.  Apan iyang respetuhon ang katungod ni Joavan nga marepresentahan og abogado nga iyang gipili.

Ang arraignment ni Peras gitakda karung Mayo 31, 2013. Wala na mohatag pa si Joavan og pamahayag sa mga sakop sa media atol sa paggawas niini sa korte.(Mylen Manto/EIM)

BID legal officer na-entrap  sa NBI-7 ug CIDG-Manila

Ni Mylen Manto

Usa ka legal officer sa Bureau of Immigration sa Mandaue City ang nasikop kagahapon sa buntag sa usa ka entrapment operation nga gihimo sa mga sakop sa National Bureau of Investigation (NBI)-7 ug Criminal Investigation and Detection Group (CIDG) Manila.

Matud ni NBI Regional Director Atty. Antonio Pagatpat nga usa ka American national kinsa mihangyo di magpahingalan ang nangayo og tabang sa ilang buhatan tungod kay gipangayoan siya’g P25,000 sa usa ka sakop sa BI aron i-extend ang iyang visa.

Si Pagatpat nagkanayon nga nakabayad na og P10,000 ang langyaw ngadto kang Atty. Serafin Abellon ug ang balanse nga P15,000 gitunol sa langyaw ngadto kang Abellon kagahapon hinungdan sa iyang pagkaaresto.

Nasuta nga ang langyaw naminyo sa usa ka Filipina nga namuyo na dinhi sa Sugbu sulod sa duha ka tuig.

Si Abellon nagdumili sa paghatag og komento dihang gikuhaan og pamahayag sa mga sakop sa media.

Kagahapon gi-file na ang kasong extortion/robbery ug a violation of Republic Act 3019 or Anti-Graft and Corrupt Practices Act batok ni Abellon diha sa Office of the Ombudsman-Visayas.(Mylen Manto/EIM) (BANAT BALITA)