300 ka eskuylahan natabangan sa CentCom sa Brigada Eskwela

CEBU, Philippines - Kapin 300 ka mga pampublikong eskwelahan ang gitabangan sa Central Command sa Armadong Kusog sa Pilipinas alang sa usa ka semanang “Brigada Eskwela” sa tibuok Visayas nga nagsugod sa milabay’ng Lunes.

Isip tinuig nga panaad ug pagsuporta sa kalihukang pangkomunidad, ang mga nagkadaiyang military units ubos sa Central Command misalmot  ug nakighiusa sa komunidad para kalinaw ug kauswagan aron sa pag-apil ning tinuig nga National Maintenance Week o mas nailhan sa tawag nga Brigada Eskwela nga programa sa Department of Education sa nagkadaiyang lugar sa Kabisay-an.

Ang DepEd magpahigayon gyud og Brigada Eskwela aron dasigon ang katawhan sa pag-ayo, mintinar ug pagpanglimpyo sa mga pampublikong eskuylahan sa dili pa ang abli sa klase.

Sa siyudad sa Sugbo, ang Cebu City Central School mao ang maswerte nga eskwelahan nga giabagan sa Army’s 53rd Engineer Brigade para sa Brigada Eskwela.

Si Mrs. Reylen Manawataw , Principal IV, Cebu City Central School mapasalamaton sa  Army engineers uban sa nagkadaiyang sector sama sa PNP, barangay officials, ginikanan, ug uban pang private organizations nga boluntaryong miserbisyo para sa Brigada Eskwela para ipreparar ang eskwelahan sa unang adlaw sa klase atol sa opening ceremony sa lima ka adlaw nga kalihukan.

Ang kalihokan naglangkob sa tulo ka “R” kini mao ang repair sa mga guba nga lamesa ug lingkuranan, replacement o ilisan ang guba na nga mga suga ug uban pa ug repainting sa mga lawak sa eskwelahan, lamesa ug lingkuranan.

Ang Cebu City Central School, usa sa dunay labing daghang tinun-an sa siyudad sa Sugbo, tungod kay giliyukan kini og walo (8) ka mga barangay.

Sa Panay Island, ang mga sakop sa 3rd Infantry Division ug 301st Infantry Brigade nisalmot sa sobra kwarenta (40)  ka mga pampublikong eskuylahan.

Sa Samar ug Leyte, ang mga sakop sa 801st brigade, 802nd brigade ug 803rd brigade nisalmot sa Brigada Eskwela sa  65 ka mga eskuylahan sa ilang lugar.

Sa Negros Island, ang mga sakop sa 302Bde ug 303Bde nisalmot usab sa Brigada Eskwela sa 35 ka mga eskuylahan sa Negros Oriental ug 102 ka mga eskuylahan sa Negros Occidental.  Ang mga units ubos sa Joint Task Force 7 sa Cebu ug Bohol nga gilangkuban sa 2nd Special Forces Battalion ug 34th Infantry Battalion mitabang usab sa mokabat 40 ka mga eskuylahan sa ilang tagsa tagsa ka mga lugar.

Samtang ang 2nd Air Division sa Philippine Air Force nanlimpyo usab sa duha  ka eskuylahan sa siyudad sa Lapulapu,  ug ang Naval Forces Central sa Philippine Navy mipadala og mga sakop aron motabang sa pagpanglimpyo sa tulo ka mga eskuylahan sa siyudad sa Lapulapu ug duha sa Loay, Bohol.

“Among paningkamotan nga mamahimong usa ka dangpanang silingan sa katawhan ug modelo sa komunidad pinaagi sa pag-apil sa nagkadaiyang kalihukan sa katilingban ilabi na ang kalihukan nga nag mensahe og Bayanihan spirit,” matud pa ni Major General Roy O. Deveraturda, Commander,Central Command.

‘Dako namong garbo sa pag-ingon nga parte usab kami niining komunidad,” dugang pa sa heneral. (3rdCRG-CRSAFP/EIM) (BANAT BALITA)