Bag-ong mayor sa Talisay misaad tabangan ang kapolisan sa siyudad

CEBU, Philippines - Gihangop sa officer-in-charge sa Talisay City Police Station nga si Superintendent Elmer Lim ang pagbisita kanila sa bag-ong napiling mayor nga si Johnny Delos Reyes kagahaponn sa buntag.

Si Lim nga nahinabi sa mga tigbalita mibutyag nga gisusi ni Delos Reyes ang sitwasyon sa police station ug nakita niini ang mga panginahanglanon sa kapolisan.

Usa niini mao ang pagpatukod og bag-ong building tungod kay ang police station karon naghuot ug karaan na kaayo.

Matud ni Lim nga kaniadto pa ang siyudad duna nay gikatakdang lote nga idonar nga tukoran og bag-ong building sa police station diha sa compound sa city hall apan i-identify pa kini kung asa nga habig sa lote diha sa city hall.

Gibutyag ni Lim nga ang gikinahanglan unta sa kapolisan nga gidak-on sa lote mga 1,000 nga matukoran sa standard nga city police station.

Ug kung klaro na ang donasyon sa lote ang national nga buhatan sa kapolisan mao nay mogahin og budget nga P5 milyones alang sa duha ka andanang building nga tukoron.

Kung matuman ang maong proyekto ang police station nga nahimutang diha sa barangay Poblacion himuon na lang unya kining sub-station.

Gipasabot ni Lim nga ang Talisay nagkinahanglan na kini og dako nga police station tungod kay nagsaka ang gidaghanon sa populasyon sa siyudad.

Gawas niini matud ni Lim nga misaad usab si Delos Reyes nga tabangan usab sila nga makabaton og mga bag-ong handheld radio ug ang ilang mga sakyanan karon paningkamotan kining mapaayo aron makondisyon pagbalik ug hatagan usab sila og dugang sakyanan. Si Delos Reyes giingong misaad usab nga ang kapolisan gahinan og budget gikan sa intelligence fund sa matag adlaw nilang operasyon. (/EIM) (BANAT BALITA)