Asawa gilugos sa iyang bayaw

CEBU, Philippines - Kasong  pagpanglugos  ang gisang-at  sa usa  ka asawa human  kini  lugosa  sa igsoon  sa iyang bana  didto sa Sitio Buyong, Brgy. Maribago, dakbayan sa Lapulapu sa miaging  kaadlawon.

Ang biktima giila sa kapolisan  nga usa ka Gina (tinuod ngan gitago) 20, ug lumad sa lalawigan sa Leyte, asawa  sa igsoon  sa  suspek  nga giila  lang  sa  ngalan  nga Mark (di tinuod  niining  ngalan) 22, ulitawo nga taga  Buyong.

Ang  biktima  miasoy  sa kapolisan  nga gikan pa sila  sa Leyte kay  namista  sa  Buyong  niadtong Mayo 21, 2013 ug  natulog  siya  sa balay  sa ginikanan sa iyang bana, diin usab  magpuyo    ang  suspetsado.

Apan  gumikan sa kalapoy  sa lawas nahinanok  siya  og  maayo  samtang  ang  suspek  ug ang  iyang  bana  nag-inom  ug  lasbag  na  kaayo hangtud   nianang  alas 4:00  sa kaadlawon  niadtong    Mayo 22.

Unya mao  na lay  namat-an  sa  biktima  ang suspek  nga  misulod  sa lawak  nga  iyang  gikatulgan  ug  miromansa  kaniya. Apan  nakabantay ang  biktima  nga dili  iyang  bana  ang  mipatong  kaniya  hinungdan nga iya  kining  giwakli  ug  didto  niya nasuta nga  ang  suspek  diay maoy  milugos kaniya.

Gumikan niini iyang gitug-an ngadto sa ilang mga ginikanan ang  nahitabo ug gipadakop dayon sa kapolisan   ang suspek ug  gipaslak  kini  sa prisohan.

Ang  biktima  mipasaka  gayud  sa  kasong  pagpanglugos  batok  sa suspek  kagahapon  didto  sa buhatan  sa piskaliya  sa  Lapulapu. (/WC) (BANAT BALITA)