Gidunggab sa tapulan nga bayaw
CEBU, Philippines - Usa ka lalaki ang samaran human gidunggab sa iyang bayaw nga pirme niyang ikalalis tungod sa katapulan ug di mangita og trabaho apan nagpuyo sa balay sa biktima diha sa Alaska Proper-Alaska, Brgy. Mambaling ning dakbayan sa Sugbo alas 5:10 kagahapon.
Ang biktima mao si Alfredo Merilles,70 anyos ug usa ka biyudo, molupyo sa naasoy’ng lugar, samtang ang suspek giila nga si Ricardo Reyes, 50, bayaw sa biktima.
Giingong nanilhig ang biktima sa gawas sa ilang pinuy-anan dihang giduol sa suspek gikan sa likod ug gidiretso og dunggab ang walang bahin sa lawas ug duha ka mga bukton.
Nahunong lang ang suspek dihang naabot ang pag-umangkon sa biktima nga si Theresita Merasis ug nababagan ang suspek kinsa mikaratil og dagan.
Daling gidala ni Merasis ang biktima sa Cebu City Medical Center samtang ang suspetsado daling nakaikyas.
Si PO1 Merlo Laborte sa Homicide Secion, CCPO mibutyag nga ang suspek mipuyo ra sa balay sa biktima apan kanunay sila nga maglalis tungod kay wala kini trabaho ug sige lang estambay. (Chelsea Quijano, CNU Intern/EIM) (BANAT BALITA)
- Latest
