MCIA di na magpahubo sa mga sapatos sa pasahero

CEBU, Philippines - Ang MCIA (Mactan-Cebu International Airport) dili na mopahubo sa mga sapatos sa mga pasahero tungod sa gipatumang higpit nga seguridad.

Kaniadto, ang mga sapatos ipasud sa Final X-ray ug Security Screening Checkpoint aron pagsusi kung wala bay kontrabando ug mga bomba nga gisud niini sama sa shoe bombs nga gigamit sa mga terorista sa ubang nasud.

Matud pa ni MCIA General Manager Nigel Paul Villarete, di na kinahanglang hubuon ang sapatos sa mga pasahero apan kinahanglang moagi gihapon sila sa Walk Through Metal Detector (WTMD).

Mandoan lang pagtangtang sa mga sapatos kung motingog ang alarm sa WTMD, o ba kaha ang pasahero nalakip sa gi-random security check subay sa Security Condition One (SECCO 1). Mahimo usab ipahubo ang mga sapatos kung taas kaayo ang hulga sa seguridad ug kun ang WTMD mikagar o wala moandar. (Chelsea Quijano, CNU Intern/EIM)

Sikyu nadayunan og kamatay  human gipusil samtang natulog

Ni Ray Anthony Espedido

Usa ka security guard ang patay human pusila gawas sa iyang panimalay sa wala mailhing lalaki didto sa Brgy. Somon lungsod sa Tuburan alas 10 sa gabii sa milabay’ng adlaw.

Ang biktima giila nga si Lelinio Montebon, 31, market guard ug molupyo sa nahisgutang lugar.

Sa inisyal nga imbestigasyon sa kapolisan sa Tuburan, nasayran nga ang bikitima natulog gawas sa balay niini ug kalit lang giduol sa wala mailhing lalaki ug gipusil sa makaupat nga higayon gamit ang wala pa mailhing kalibre sa pusil.Atol sa imbestigasyon, nasakmit ang upat ka basiyo sa bala ug usa ka kabhang sa wala matinong kalibre sa armas.

Ang biktima nakaangkon og samad pinusilan sa lain-laing bahin sa lawas, ug kasamtangang gipahiluna ang patay’ng lawas sa Tuburan Health Center aron sa autopsy examination.Padayon pa sa gipahigayong imbestigasyon ang kapolisan sa Tuburan kabahin sa hitabo. (BANAT NEWS)