Compound nasunog

CEBU, Philippines - Usa ka residential compound nga nahimutang diha sa sitio ESCO barangay Guadalupe naugdaw human miulbo ang dakong sunog pasado ala una kagahapon sa hapon nga nakontrolar sud lang sa 20-minutos. Usa sa mga nasunogan nga si Vicente King, 78, nga kanhi traffic enforcer, mibutyag nga diha siya sa taas nga bahin sa ilang panimalay nagkalingaw og tan-aw og telebisyon dihang iyang nadunggan ang iyang apo nga nagsiyagit nga adunay sunog. Matud pa sa mga residenti nga nagpuyo dapit sa maong compound nga aduna sila’y nakitang nag-spark gikan sa wirings nga nagkonektar sa compound. Samtang si Cebu City Fire Marshal William Tacaldo miingon ilaha pang subayon kung unsay sinugdanan niini.Wala hinuoy nasamdan  o namatay sa maong sunog. Gisubay pa kung pilay danyos niini. (BANAT NEWS)