Pagpagawas sa pundo sa Talisay kuwestionabli

CEBU, Philippines - Kagamhanan sa dakbayan sa Talisay giingong dunay irregularities kabahin sa pagpagawas sa pundo gikan sa panudlanan sa siyudad.

Kini kabahin sa consultancy fees nga gikuha gikan sa Special Education Fund.

Sa gipahigayong pag-review sa record nasuta sa Commission on Audit (COA) nga si Mayor Socrates Fernandez migama og kontrata tali kang Atty. Edwin Antipuesto gikan niadtong Hulyo 2009 ngadto sa  Disyembre 2012 isip consultant sa Human Resource and Personnel Actions ug uban pa nga dunay kalabutan sa school board concern.

Si Antipuesto nagdawat kini og P15,000 nga bayad matag buwan diin ang maong kwarta gikuha gikan sa pundo sa Special Education Fund (SEF).

Mikabat ngadto sa P615,000 ang nadawat nga bayad ni Antipuesto gikan niadtong tuig 2009 hangtud sa tuig 2012.

Ang audit commission base sa ilang audit report nagkanayon kini nga ang maong transaksiyon nakasumpaki sa Section 163 sa Government Accounting and Auditing Manual sa Local Government Code ilabi na sa paggamit sa SEF.

Ang audit body nagkanayon kini nga ang siyudad kinahanglang mosunod kini sa provision sa Local Government Code kabahin sa disbursement sa SEF.

Ang Section 100 (Paragraph C) sa code nag-limit kini sa paggamit sa SEF diin nagkinahanglan kini og desisyon gikan sa Local School Board.

Ang SEF gamiton kini alang sa construction, pag-ayo ug maintenance sa school buildings ug ubang pasilidad sa pampublikong tunghaan sa elementarya ug segundarya.          

Sunod gamiton kini sa establishment ug maintenance sa extension sa klase kung kinahanglanon, sports activities sa division, district, municipal ug barangay levels.

Ang SEF sa siyudad nakuhaan kini og P615,000 tungod sa dili saktong paggamit niini. Ang maong report gilagdaan ni State Auditor IV, Ma. Daisy Bercede ug Supervising auditor Delia Monte de Ramos.

Ang COA mimando sa mga opisyal sa siyudad sa paghatag og eksplinasyon sa paggamit sa SEF sa dili purpose niini ug angayang gamitan. (BANAT NEWS)