Allowance sa BPAT ihatag na sa CH
CEBU, Philippines - Gamay nalang ang paabuton sa mga sakop sa Barangay Peacekeeping Action Team (BPAT) ug madawat na nila ang ilang nalangay nga P9,000 allowance gikan sa Enero hangtod Marso human kini dugay na nga nalangay.
Sigun pa sa presidente sa BPAT nga si Deogracia Sumaylo, pirma na lang sa mayor maoy gipaabot sa ilang mga papeles aron maaprubahan ang dugay nang gipaabot nga allowance sa mga membro sa BPAT nga gikan pa sa Enero niining tuiga.
Si Sumaylo nagkanayon nga sa iyang paglingkod isip bag-o nga presidente sa BPAT niadtong Marso 16, iya dayon gisugdan ang pag-atiman sa mga payroll sa dili mominos 100 ka mga sertipikadong BPAT.
Dugang pa niya nga sayo niya gi-sumiter ang payroll alang sa BPAT niadtong hinapos sa Marso apan nalangay kini tungod kay walay detalyado nga financial plan gikan sa account nga maoy gikuhaan sa budget.
Karun nga nakompleto na ug napirmahan na sa budget officer, Nelfa Briones, ang mga rekisitos pirma na lang sa mayor maoy kuwang aron matagamtaman na nila ang tag P3 mil nga binulan nga allowance niini. Ang dokumento anaa na sa buhatan ni Mayor Michael Rama kinsa 22 ka adlaw nga nagbakasyon, apan una pa mopirma si Rama pirmahan pa kini sa napildi nga bise mayor nga si Vice Mayor Joy Young. (BANAT NEWS)
- Latest
