“Hummer” ni Alcover gidauban

CEBU, Philippines - Sakyanan ni Association of Nationalism and Democracy (ANAD) partylist Representative Pastor Jun Alcover gisunog sa barangay Loong sa lungsod sa Tabogon sa milabay’ng gabii.

Ang maong sakyanan nga usa ka locally-made “Hummer-type” jeep gi-park sa provincial road distansiya og usa ka gatos ka metros gikan sa iyang balay sa nahisgutang lugar matud pa ni PO2 Steve Booc sa Tabogon Police.

Duha ka mga motorsiklong pulos may mga angkas nga lalaking nagtaptap sa ilang mga nawong ang giingong misunog sa sakyanan sa kongresista.

Sumala pa nga nagbahas-bahas  sa lugar ang duha ka motor ug ang naulahi mihunong duol sa sakyanan sa magbabalaod ug ang angkas mikanaog ug miduol sa sakyanan dayon nagdali pagbalik sa motor ug dungan nga namiya sa lugar padung sa direksyon sa siyudad sa Bogo.

Wala magdugay giingong namatikdan sa mga molupyo ang kalit lang nga pag-ulbo sa aso gikan sa sakyanan ug nasunog dayun kini. Gitabangan pa og sablig og tubig sa mga tawo ang sakyanan apan napakyas gyud sila sa pagpawong niini.

Wala pa matino sa kapulisan kung si kinsa ang mga arsonista.

Apan si kongresista Alcover mitataw nga dako ang iyang pagtuo nga may kalambigitan sa lokal nga politika sa maong lungsod ang pagsunog sa iyang sakyanan.

Giklaru usab dayon niya nga dili mahalon ang iyang hummer jeep tungod kay hitsura ra niini ang kaparehas sa mga imported nga hammer vehicles.

Nasayran nga aktibong mikampanya si Alcover sa iyang anak Lemar Alcover nga mikandidato pagkamayor sa maong lungsod sa milabay’ng eleksyon apan gipildi ni Mayor elect Siegfred Duterte. (BANAT NEWS)