Trabahante gipusil patay sa estambay

CEBU, Philippines - Namatay  ang  usa  ka  construction  worker  nga gipusil  sa usa  ka  estambay  didto sa Sitio Wangyu Alaska, Brgy. Mambaling ning dakbayan sa Sugbo alas 7:35 sa buntag kagahapon.

Ang biktima   giila nga si Edmar San Andres, 29, construction worker, lumad nga taga Brgy. Ipil, Bongabong, Mindoro ug temporaryong nagpuyo sa SRP sa nahisgutang barangay.

Atol sa pasiunang imbestigasyon sa kapolisan  nasayran   nga ang biktima napalgang patay  sa eskina sa naasoy  nga    lugar nga  may samad-pinusilan sa iyang likod ug tuong bahin sa dughan ug bukton.

Matud ni Edgar San Andres, kauban  sa trabaho ug igsoon sa biktima nga milakaw   nga  wa  mananghid  kaniya ang  biktima sa maong  higayon apan  pipila  ka  gutlo nabalitaan na lang  nila  nga  patay  na  kini.  Sa gipahigayong follow up investigation sa Homicide Section,  sa Cebu City  Police  Office (CCPO)  nasayran  nga  usa ka ginganlan  og Allan “Kirig” Barenian, hingkod ,wa’y trabaho ug molupyo sa Sitio Lawis, sa maong  barangay  maoy gitumbok  nga miluthang  sa biktima  ug  mao  kini  karon  ang  gipangita  sa kapolisan. Si SPO2 Teodoro Lumanas ug mga kaubanan sa Crime Scene and Investigation Unit, CCPO  mao’y mirespondi sa insidenti ug nakuha niini ang pitaka sa biktima ug ang iyang identification card. Wala  pa masayri  sa kapolisan  ang  hinungdan  sa maong  pagpamusil. (BANAT NEWS)