Ulitawo ug dalagita naghikog

CEBU, Philippines - Usa ka dalagita ug  laing ulitawo ang naghikog  gumikan sa bug-at  nga  problema  sulod  sa ilang tagsa-tagsa  ka  panimalay  sa mga  dakbayan sa Danao ug Lapulapu  kagahapon  ug  sa miaging  adlaw.

Ang  nagbitay  og  pisi  sa  Lower  Pusok,  syudad sa Lapulapu kagahapon  sa buntag  mao  si Jeb  Buanghog  Jabarro, 24, way klarong  trabaho,  nga molupyo  sa maong  lugar.

Samtang  didto  sa  barangay  Guinacot, dakbayan  sa Danao, giila  sa kapolisan  ang  naghikog nga si Jasmine Rubi, usa ka  estudyante  sa maong  dakbayan.

Si PO3 Laydo Pinos  sa Lapulapu  City  Police  Station mibutyag  nga  gituohan  nila  nga naguol  pag-ayo  si  Jabarro  kay gibiyaan  sa iyang  uyab  hinungdan  sa  paghikog  niini.

Gibasehan  ni Pinos  ang nahipos  nilang  kasayoran  sa pag-imbistigar  nila  sa mga  kabanay  ni  Jabarro  kinsa  mitug-an nga mitawag  ang  uyab  sa ulitawo  alas 3:00  sa kaadlawon  kagahapon  nga  nagpahibawo  sa  paglarga  niini  ngadto  sa laing  lugar. Mao  usab  kini  nabasahan  sa  mga  tagtungod  ni  Jabarro  sa katapusang  text message  niini  ngadto  sa iyang  uyab  nga  nagkanayon “mopahuway na gyud ko, sorry  imong  USB  naa nako  kuhaa nya  ni.”

Si Nino Mago,  ig-agaw  ni  Jabarro  mibutyag sa kapolisan  nga siya’y  unang  nakadiskobre  kagahapon  sa buntag  nga  nagbitay  na si Jabarro sa  pisi  nga  gibalighot  sa liog  niini  ug  ang  tumoy  gigaid  sa sagbayan sa ilang  balay  sa ikaduhang  andana  niini. Kini  samtang  misaka  siya (Nino)  kay  nagkuha  sa yawe  sa iyang  motor  nga didto  sa  taas  nga  bahin  sa maong  balay.

Samtang  ang  kapolisan  miingon  nga  mao  kadtoy  ikatulo  nga  paghikog  ni  Jabarro  nga  nagmalampuson  kay  sa una  ug  ikaduha,  napakyas  kini  sa pagkutlo  sa iyang  kinabuhi.

Samtang  si Rubi  napalgang  nagbitay  na  sa pisi  nga  gihikot  gihapon  sa liog  niini  ug  gigaid  ang  pikas  tumoy  sa sagbayan  sa ilang  balay  pinaagi  sa manghud  niini  nga  si Gelyn Rubi.

Kini  dihang  gipangita kini  kay  maniudto  na  sila , apan  pagsaka  ni  Gelyn  sa ikaduhang  andana  sa  ilang  balay  nakurat  kini  dihang  maoy  misugat  sa iyang  mga  mata nga  nagbitay  na  ang  iyang  igsoon.

Ang  ilang  amahan  nga  si  Jose  Charles Rubi misakwat  dayon  sa  iyang  anak  ug gihatod ngadto  sa Danao City  District  Hospital  apan  gideklarar  kining  patay  na  sa pag-abot  didto.

Nasuta  sa kapolisan nga problema  sa pamilya  ang  hinungdan  sa paghikog  sa dalagita.

Miasoy  usab  ang  amahan  niini  sa  mga  polis  nga  kanunay  nila  kining  mapanid-an  nga  magpunay  lang  og  hinuktok  apan wala  mosugid  kun  unsay  iyang problema.

Ang  duha  ka  paghikog  gisuta  sa kapolisan  nga walay  foul  play.  (BANAT NEWS)