Magsuong ‘Bigtime’ pushers gidakop sa NBI

CEBU, Philippines - Mokabat sa P350-P400 mil nga kantidad sa mga gidudahang shabu ang nasikop sa NBI (National Bureau of Investigation) human gi-raid niini ang balay sa mga managsuon nga gituohang mga bigtime dealers sa drugas dinhi sa dakbayan sa Sugbo kagahapon sa buntag sa dalan Ingles, Barangay Guadalupe.

Ang maong pagpang-raid gipangulohan ni Atty. Bernard de la Cruz sa NBI pinasikad sa search warrant ni Judge Silvestre Maamo batok sa magsuong sila si Arman Cavan, 42, ug Michael Cavan, 35.

Matud ni Atty. Antonio Pagatpat, Regional Director sa NBI atol sa gipahigayong press conference kagahapon, kapin duha ka bulan nilang gipanid-ang ang mga suspetsado ug kagahapon lang sila nakahigayon paghimo og operasyon.

Ang NBI gikuyogan sa mga sakop sa Philippine Navy-SWAG (Special Warfare Group) misulod sa balay sa mga suspetsado ug didto usab nasikop ang mga suspek.Nakuha sa NBI ang daghang putos sa gidudahang shabu ug mga drug paraphernalia nga mokabat og dul-an tunga sa milyon ka pesos. Nagdumili pagtubag ang duha sa mga pangutana sa media bahin sa pasangil kanila.  (BANAT NEWS)