Talisay college nangolekta’g bayad nga way resibo?

CEBU, Philippines - Ang Talisay City College (TCC) nangolekta og mga school fees nga wala moisyu og resibo kini base sa Audit Observation Memorandum (AOM) sa Commission on Audit (COA) nga dunay petsa niadtong Marso 1, 2013.

Matud sa report nga nasuta sa AOM sa ilang gipahigayong review sa Disyembre 31, 2012 nga dunay mga koleksiyon nga gihimo ang TCC sama sa nagkalain-laing school fees nga mokabat ngadto sa P10,553,270 nga walay mga resibong giisyu.

Ang maong kwarta giingong wala usab kini ma-remit ngadto sa city treasurer.

Kahinumduman nga ang TCC usa kini ka pampublikong tunghaan nga gidumala sa kagamhanan sa siyudad.

Ang COA nagkanayon nga ang maong wala pag-remit sa nahisgutang kwarta ngadto sa city treasurer kalapasan kini sa Section 15 ug 30 sa New Government Accounting System (NGAS) Manual for Local Government Unit (LGU) Volume I.

Ang Section 15 nagkanayon kini nga “that the officers of the local government authorized to receive and collect monies arising from taxes, revenue or receipts of any kind shall remit the full amount received and collected to the treasury of such local government unit which shall be credited to the particular account or accounts to which the monies in question”.

Samtang sa Section 30 nagkanayon kini nga “collectors/tellers shall issue a receipt to acknowledge collection made. The receipt maybe in the form of pre-numbered receipts, or cash tickets and the alike”.

Base usab sa inquiry nga ang TCC nga gipangulohan sa ilang presidente nga si Dr. Tomas Ramos nagsugod sa operasyon niadtong school year (SY) 2004-2005.

Gawas sa mga tuition sa undergraduate nga estudyante ang TCC nangolekta usab kini og nagkalain-laing school fees nga wala ma-remit ngadto sa city treasurer’s office (CTO) ug nagpagawas usab kini og  kwarta gikan sa maong nakoleksiyon nga walay approval sa Board of Trustees. Sa undergraduate school ang TCC mikolekta kini sa mga estudyante og entrance examination fee nga P300 matag estudyante; insurance fee nga P100 matag semester; development fee nga P70 sulod sa upat ka buwan matag semester; assessment fee P550 matag estudyante; review fee nga P3,500 matag reviewee; tuition fee nga P3,000 matag semester ngadto sa mga estudyante kini mokuha og Diploma in Professional Education (DPE) ug P3,000 sa trimester sa mga estudyante nga mokuha og masteral; graduation fee nga P1,000-P1,500 ug transcript of record nga P50 matag pahina.

Nasuta usab sa AOM nga gikan niadtong school year 2008-2009 hangtud sa 2012-2013 ang TCC dunay nakolektang P10, 553,270 gikan sa mga estudyante nga entrance/examination fees; insurance membership fee; development fee; NC II TESDA assessment fee; LET review fee; DPE/MA.Ed/MPA tuition fee; graduation fee ug sa transcript of records.

Gikan sa tuig 2008-2012 ang TCC duna kini nakolektang P873,900 nga entrance/examination fee; P1,317,900 sa insurance membership fee; P3,690,120 nga development fee; 432,850 nga TESDA assessment fee-NC II; P1,760,500 sa review sa LET; P648,000 sa tuition fees sa DPE, MA.  Ed MPA; P1,696,500 sa graduation fee ug P133,500 sa transcript of record. (BANAT NEWS)