Gipusil sa tiyan bala milapos sa buko-buko

CEBU, Philippines - Kritikal ang kahimtang sa usa ka ulitawo human  lapsi  sa bala  nga  mitaroy sa  iyang  tiyan  gikan  sa armas  sa  wala  hiilhing  kriminal  didto  sa  barangay Tal-ot sa lungsod sa Barili niadtong Sabado sa alas 2:00 sa hapon. Ang biktima mao si Jimboy Sanchez, 22, ulitawo,  nga  molupyo  sa maong  lugar, samtang   ang  kriminal giingong  nagsakay  og  motorsiklo  nga  walay  nakaila.

Si PO2 Richard Cababat sa Barili Police   Station mibutyag  sa Banat News  nga ang  biktima  naglakaw  paingon na   nga mopauli  sa ilang  balay   subay sa  barangay road sa maong lugar, dihang  pag-abot niini sa mingaw nga bahin,  kalit  lang siyang  gihunongan  sa usa  ka  motorsiklo  nga  giluwanan  sa duha  ka wala  hiilhing  lalaki.

Matud  pa  wala  na  manaog  sa ilang  sakyanan  ang  mga  kriminal  kay  ang  angkas  niini  maoy  milanit  sa iyang  armas  ug  gidul-it  sa tiyan  sa biktima dayong  pabuto  ug  ang  bala  niini  milapos  sa buko-buko  sa biktima. Human  matumba  sa yuta  ang  biktima,  dali kaayong  mibiya  ang  mga  kriminal  ug  gipasagdan  ang  biktima  nga  nag-agu  sa kasakit  samtang  mibuhagay  ang  daghan  niining  dugo  gikan  sa iyang  samad  pinusilan.

Ang  mga  tawong  nakaagi  kaniya  maoy  mihatud  sa biktima  ngadto  sa Barili District Hospital apan gibalhin   kini   sa tambalanan  sa dakbayan sa Sugbo  gumikan  sa katalandugon  sa iyang  kahimtang.

Ang kapolisan padayon pa sa ilang imbistigasyon pag-ila   sa kriminal  ug pagtumbok sa motibo sa maong  pagpamusil. (BANAT NEWS)