Call center gi-rAID

CEBU, Philippines - Nakurat ang mga call center agents nga nagtrabaho sa usa ka call center company sa uptown area sa dakbayan sa Sugbu dihang gisulod sila sa mga polis pasado ala-una kagahapon sa kaadlawon.

Ang pagpangronda gihimo pinasikad sa search warrant nga giluwatan ni RTC-Branch 11 Judge Ramon Daomilas tungod sa giingong scam nga namiktima og mga kustomer gikan sa abroad.         Ang Anti Cybercrime Group sa Criminal Investigation and Detection Group-7 nakadawat og mga reklamo gikan sa mga langyaw kabahin sa gihulagway nilang pagpangilad nga na-trace gikan sa maong call center company.

Matud pa usab nga dunay  call center agents sa maong kompanya ang mismong mihatag og tip kabahin sa gidudahan nilang scam nga ilang gitrabaho.

Ang kompanya matud pa gi-operate sa usa ka babayeng nagbase sa gawas sa nasud maong wala kini maaresto. Giimbitar sa CIDG ang 120 ka trabahante ug gisakmit ang 400 nila ka mga computers.

Sumala pa nga ang mga kustomer tawgan pinaagi sa telepono gikan sa maong call center company ug agnihon sila nga mopa-miyembro sa usa ka Waka Networking Savings aron maka-avail sila og mga freebies nga naglakip sa balor 100 dolyares nga gasolina ug  mga gift certificates sa usa ka popular nga kompanya.

Apan bisan nakabayad na sila wala mangabot ang mga gisaad nga packages ug gisigehan gihapon sila og paningil og bayad.Sumala pa nga i-charge og 2.99 dollars online ang buot magpamiyembro.

“Masuko sila ini’g call namo kay ang uban wa kadawat sa ilang gift cards unya sige daw mi’g panawag ang uban not interested na ngano kuno balik lang gihapon mi’g tawag nila,”padayag pa sa usa ka call center agent nga wala magpahingalan.         

Matud pa ni Sr. Insp. Michael Virtudazo ang hepe sa Anti-Cybercrime Group ilang gihangyo ang mga call center agents nga mopasaka og kaso batok sa tagdumala sa maong kompanya aron mapalig-on pa ang ipasaka nga kasong kalapasan sa 8484 kon Access Device Act. (BANAT NEWS)