Duha KA TAWO nalubaan pULOS angol

CEBU, Philippines - Duha ka mga batan-on ang nalandig  sa tambalanan human  madunggabi  sa managlahing  takna  ug  lugar  ning  lalawigan  sa Sugbo  sa miaging  adlaw.

Ang  mga  biktima  mao  sila  si Jonel Pelayo, 19,  taga  barangay  Dakit, dakbayan  sa Bogo, ug Andrew Arroyo, 16, taga  sitio Dobdob,  barangay  Bongon, lungsod  sa Tabuelan.

Ang  nakaluba  kang  Arroyo  mao  si Felix Agudo, 32,  nga  iyang silingan , samtang  wala  hiilhi  ang  midunggab  kang  Pelayo. 

Ang blotter  sa kapolisan  sa Bogo  Police  Station nagbutyag  nga  si  Pelayo  uban  sa igsoon  niini  ug  usa  ka higala  nanisko  didto  sa   Sitio Manggahan, Brgy. Libertad , syudad sa Bogo .

Nianang  pagka-alas  4:00  sa  kaadlawon,  mamauli  na  unta  sila dihang   may  grupo  sa wala  hiilhing  mga  lalaki  nga  miatang  kanila  gawas  sa diskohan.

Samtang  naglakaw  sila  gibato  sila  niini  busa nanagan  sila  apan  nadakpan  sila  ug  usa  sa maong  grupo  milanit sa iyang  kutsilyo  ug  giluba  sa buko-buko  ang  biktima.

Dali kining  gihatud dayon  ngadto  sa Cebu Provincial Hospital sa Bogo apan gibalhin  kini  sa Vicente Sotto Memorial Medical Center, sa dakbayan  sa Sugbo. Padayon pang  gipangita  sa kapolisan ang  Kriminal.

Samtang  si Arroyo,  dugay  na  nga  nagkabangi  ug  si Agudo  ug  dihang  nagkakita  sila, naunhan  siya  ni  Agudo  sa pagluba  ug  maayong  pagkaigo  sa  iyang tuong  kilid.

Gihatud  dayon  ang  maong  biktima  ngadto   sa Juan Dosado Memorial Hospital  sa lungsod  sa Sogod.  (BANAT NEWS)