Napalgang patay giatake sa sakit?

CEBU, Philippines - Usa ka lalaki ang napalgang patay  sulod  sa  apartment didto sa N.Bacalso Avenue, Barangay Kinasang-an ning dakbayan kagahapon sa alas 6:00  sa buntag

Ang patay mao si Antonio Cuarisma, 48,kasamtangang nagpuyo sa maong dapit

Matud ni Eriberto Cabanada, 69, molupyo sa  Barangay San Nicolas kinsa  bana  sa pag-umangkon  sa biktima nga ila  kining gibisitahan  sa  giabangan  niining   apartment  kagahapon  sa buntag.

Apan  maoy  naabtan  nila  nga  naghigda kini  sa katre  nga  wala  na  maginhawa.

Dugang  pa ni Cabanada tulo ka semana pa lang  si Cuarisma dinhi  sa Cebu kay   lumad kini  nga taga Mindanao ug  ang  tuyo  niini  dinhi  mao  ang  pagpangita  og  trabaho.

 Si SPO4 Jesus Moga sa Homicide Section  sa Cebu  City  Police Office nagkanayon  nga wala  silay  nakitang  foul play   sa kamatayon  sa  biktima.

Apan  padayon  pa  nilang  giimbistigar  ang  maong  hitabo  aron masuta  unsay  namatyan  niini.

Hinuon  di  kalikayan  ang  katahap  sa  dakong  kalagmitan  nga  giatake  kini sa  sakit. Apan si Cabanada  mipamatuod  nga himsog  kaayo  ang  biktima  base  sa iyang nasud-ong  niini  niadtong  Lunes, adlaw  sa election. (BANAT NEWS)