4 ka BEI gipahapa ug gipabuthan sa armadong grupo

CEBU, Philippines -  Upat ka mga Barangay Election Inspectors (BEI)  nangayo og tabang sa kapolisan human kini pabuthi  sa  armas  sa  mga  armadong tawo   nga miatang  kanila didto  sa sitio Hunob , barangay  Guadalupe, dakbayan  sa   Carcar  kagahapon sa kadlawon.

Usa sa mga BEI nga si Rosalia Barbadillo mibutyag nga mga alas 4:00 sa kaadlawon misakay sila og truck   nga  gikargahan  usab  sa  mga  ballot boxes paingon sa eskuylahan  sa sitio Hunob. Apan  gihakop  sila  sa hilabihang  kakuyaw  dihang  may  usa  ka sakyanan  sa awaaw  nga  bahin  paingon  sa eskuylahan  sa  Hunob nga  giluwanan  sa wala hiilhing   mga armadong tawo.

Dayon  gimandoan  sila  sa pagpahapa  ug  gipabuthan  sila  sa  mga  armas niini  ug maayo  na lang  kay  wala  ipunting  kanila  ang  mga sumbohan  niini.  Si PO1 Mario Ewayan kinsa nadestino sa eskuylahan sa maong  lugar  nga nagbantay sa PCOs machines  maoy   nakadawat   sa  text message gikan sa mga BEI nga nangayo og tabang.

Gituohan  sa kapolisan  nga  pulos  lang  panghadlok  ang  gihimo  sa maong  grupo ug wala  kini  tuyo  sa pagpatay.

Padayon  pa  nilang  gipanid-an    ang  maong   mga  tawo,  sumala  ni  PO1 Ewayan. (/WC) (BANAT NEWS)