Rally sa Alayon gidugok sa mga tawo

CEBU, Philippines - Napuno sa mga tawo ang terminal sa mga traysikol diha sa barangay Tabunok, dakbayan sa Talisay sa gipahigayong grand rally sa grupo sa Alayon niadtong Sabado sa gabii.

Uban sa mga supporter sa Alayon  misaka na kini diha sa flyover tungod sa kahuot sa ubos nga bahin.

Ang terminal sa Tabunok duna kini gilapdong 3,000 square meters.

Si Rodney Aquino assistant head sa traffic enforcer sa dakbayan sa Talisay mibana-bana nga mikabat ngadto sa 10,000 ka mga tawo ang mitambong sa maong rally.

Matud ni Aquino nga nakasinati og kahuot ang trapiko diha sa Tabunok hinuon flowing kini.

Ang kapin sa 80 ka mga traffic enforcer full force kini sa ilang duty niadtong Sabado sa gabii pagmando sa trapiko.

Ang mga supporter sa Alayon nga naggikan sa barangay Tanke, Dumlog, Bulacao, Lagtang, Manipis ug Linao, Mohon ug uban pang mga barangay ang nagpahigayon og torch parade paingon diha sa terminal.

Ang mga lider sa Women Federation, Barangay Health Worker (BHW), Urban Poor, Youth Association, Traysikol Ferderation, Sangguniang Kabataan Federation ug Association of Barangay Captain ang mipadayag sa ilang suporta ngadto sa Alayon.

Si Kongresista Eduardo Gullas kinsa maoy lider sa Alayon ug magpapiling mayor sa dakbayan sa Talisay nagpasalamat kini sa mga Talisaynon nga mihatag og dakung suporta sa Alayon.

Gibutyag sa Kongresista nga naggama og in-house survey ang Alayon diin sa 25,000 ka mga respondent haros niini misuporta sa Alayon. Ang Talisay duna kini 111,696 ka mga registered voters ug ang Kongresista nanghinaot nga tanang kaalyado sa Alayon ang suportahan. (BANAT NEWS)