Upat ka bata nga milayas giilad, 13-anyos gilugos

CEBU, Philippines - Usa ka 13-anyos nga batang babaye ang giingong gipahimuslan sa usa ka wala mailhing lalaki nga nagpakaaron ingnon nga motabang kanila nga dad-on sa Department of Social Welfare and Development- Danao City kini aron mahatagan og assistance.

Ang 13-anyos nga batang babaye giingong kuyog kini sa iyang tulo ka mga igsuong lalaki nga nagpangidaron og 11, 7, ug 2-anyos  nga milayas sa ilang balay tungod sa pagkasaba kanila sa ilang amahan.

Ang bata mihulagway lang sa rapist nga gamayon ug mubo’g buhok.

Sa imbestigasyon sa kapolisan sa lungsod sa Carmen, ang biktima giingong uban sa iyang mga igsuon nga nagbaklay sa dalan sa barangay Cantumog sa maong lungsod tungang gabii tungod kay gikasab-an sa ilang amahan.

Matud pa nga kalit silang gihunongan sa usa ka tawong nagmotor ug giingnan silang tabangan pinaagi sa pagdala kanila ngadto sa Department of Social Welfare and Development- Danao City.

Sumala pa nga giingnan siya sa maong lalaki nga ibilin lang una ang iyang mga manghod kay ilang adtoon ang DSWD maong misanong usab ang biktima ug ang mga manghod nga maghuwat na lang sa maguwang.

Apan sa diha nga naabot na sila sa may Reclamation Area sa barangay Poblacion giingong didto na gihimo sa maong lalaki ang yawan-on niining katuyoan nga pahimuslan ang biktima ug pagkahuman gibiyaan.

Ang bata igo na lang sa pagdanguyngoy ug mibalik sa lugar diin gibilin iyang mga manghod ug midangop sila sa kapolisan.

Sumala pa nga nasuko ang papa sa mga bata tungod kay gibaligya ang ilang mga gamit sa pamanday. Ang kapolisan padayon pa sa pagpangita sa rapist.  (BANAT NEWS)