Pundok sa kabataan sa Cebu City mosuporta sa Team Rama

CEBU, Philippines - Pundok sa mga kabatan-onan mi-endorsar sa Team Rama alang sa piniliay karong adlaw nga Lunes. Ang mga youth leaders gikan sa Youth for Mike (YFM), Cebu City Youth Movement (CCYM), Cebu City Federation for Tertiary Supreme Student Council (CCFTSSC), Kugi Uswag Sugbu (KUSUG) Youth, Peace Interfaith, Junior Educators Alliance Of the Philippines ug  ang Sangguniang Kabataan Federation (SKF) Cebu City naghugpong sa pagpakita sa ilang suporta sa grupo ni Cebu City Mayor Michael Rama atol sa nahibiling 36 ka oras sa pagpangampanya. Si Devyn Genel Cabataña, Vice President sa Cebu City SKF mibutyag nga niadtong Mayo 7 susama og naghimo sila’g “blood compact” dihang  ilang gilibot ang mga grupo sa mga batan-on sa nagkadaiyang barangay sa syudad sa Sugbu.

Mapasigarbuhon usab ang Youth for Mike nga nakuha na nila ang simpatiya sa mga batan-on gikan sa 69 ka mga barangay nga nahisakop sa syudad  tungod sa ilang pagpaningkamot.

Malaumon usab ang maong grupo nga makuha nila sa hingpit ang 8 mil ka botos gikan sa mga batan-on  alang sa Team Rama.

Matud ni Cabataña, 50 porsiyento sa mga opisyales sa Sangguniang Kabataan sa Syudad adto suporta ni Rama.

Sa laing bahin, mipadangat usab og suporta ngadto sa Team Rama ang Barangay Kagawad sa Dakbayan (BARKADA) nga gipangulohan ni Nicolas “Jun” Malazarte sa barangay Suba.

Matud pa niya way nagdiktar kanila pag-endorsar kang Rama ug partido niini. (Jessa Celocia, CNU Intern/EIM) (BANAT NEWS)