Bigtime drug pusher na-buybust

CEBU, Philippines - Usa ka kanhi piniriso nga giingong bigtime drug pusher ang nasikop sa mga sakop sa Provincial Intelligence Branch human kini makuha-i og mga binultong gituohang shabu diha sa barangay Sabang dakbayan sa Danao pasado alas-8 sa miaging gabii.

Ang nasikop mao si Alberto Hermosillo alyas Al, molupyo sa maong dapit.

Sa pakighinabi sa Banat News ni SPO1 Allen Francis Villamor, ang team leader sa maong operasyon mibutyag kini nga nakadawat sila og taho kalabot sa ilegal nga kalihokan ni Hermosillo sa maong dapit.

Human makompirmar ang maong impormasyon gilusad ang buybust operation sa maong dapit diin gipalitan og balor P500 nga shabu ang suspek nga miresulta sa iyang pagkasikop.

Nakuha gikan kang Hermosillo ang usa ka dakong pakete nga nagkantidad og P25 mil ug usa ka medium pack nga nagkantidad og P3 mil. Gawas niini, nakuha usab ang pipila ka mga deposits slips gikan sa mga kostumer sa suspek.

Sumala pa nga gikan sa Cebu City ang supply sa shabu sa suspek nga itunol sa naila lang sa alyas Kokoy. Ang shabu anha iapud-apod sa Catmon ug lungsod sa Lilo-an.

Matud ni Villamor nga si Hermosillo napriso na niadtong 2008 tungod  gihapon sa ginadiling drugas apan na-dismiss. Samtang ang hepe sa PIB nga si Supt. Rodulfo Albotra mibutyag nga networking ang klase sa pagpamaligya ni Hermosillo. (/EIM) (BANAT NEWS)