Pangabaga ni Rama giakusahang nanghulga

CEBU, Philippines - Ang chief of staff ni Mayor Michael Rama gipasanginlan nga nanghulga sa presidente sa Cebu City Scholars kay matud pa nasuko nga tua kini motabang og kampanya ni Kongresista Tomas Osmeña.

Si Gerald Lariosa nga nagtungha sa Asian College of Technology (ACT) nagkanayon nga gitawgan siya ni Philipp Zafra kaniadtong Martes sa udto ug nasuko kini kaniya.

Sa press conference kagahapon didto sa Mariners Court Hotel, si Lariosa miingon nga nahadlok gayud siya sa hulga kaniya ni Zafra  mao nga napugos siya sa pagreport ngadto sa Cebu City Police Office (CCPO)-Station 2 nga nagbase sa atbang sa Camp Osmeña.

Si Lariosa miingon nga nakamaneho siya pag-rekord sa ilang panaghinabi ni Zafra sa telepono ug iyang gipadungog sa mga sakop sa media atul sa press conference kagahapon.

Atol sa press conference kagahapon, si Lariosa uban sa mga lider sa city scholars sa lainlaing tunghaan mipadayag og kaandam sa pagsuporta sa kandidatora, ni Osmeña pagka mayor atbang ni Rama.

Apan si Zafra miingon nga wala niya hulgaa si Lariosa ug igo lang niya nga giawhag nga dili gamiton ang scholarship program sa dakbayan sa pamolitika.

Si Zafra miingon nga gipahinumdoman usab niya si Lariosa nga mosumiter na sa mga gikinahanglan nga dukomento nga magsuporta sa gihatag kaniya nga “cash advance” sa kalihukan sa mga scholars.

Matud ni Lariosa nga human sa ilang panaghinabi ni Zafra, nakadawat siya og daghang text messages gikan sa sender nga wala siya makaila ug mihulga na gayud kaniya.

Usa sa mga text messages nga nakapalisang kaayo ni Lariosa nagkanayon “Nakatultol ko kun hain ka magpuyo ug sayon ra kaayo ang pagtipi nimo.” –(BANAT NEWS)