Team Rama nangangkong modaog sa Mayo 13

CEBU, Philippines - Sigurado na ang Team Rama nga modaug pag-usab si Mayor Michael Rama sa iyang pagpapili pagbalik pagkamayor sa dakbayan atol sa eleksyon karong Mayo 13.

Si Konsehal Jose Daluz III, general campaign manager sa Team Rama, mibutyag sa resulta sa giingon niya nga tulo ka survey nga gihimo matud pa sa grupo sa mga magpapatigayon nga taga Manila.

 Duha sa survey gihimo kaniadtong Pebrero ug Oktubre sa miaging tuig, samtang ang katapusang survey gi-release ang resulta kaniadto lang Mayo 1.

Miingon si Daluz nga 40,000 ka tawo ang ilang gihimoan og survey nga nagrepresentar kini og otso porsiyento sa 547,681 ka botante sa tibuok dakbayan sa Sugbo. Si Daluz miingon nga base sa survey, si Kong.Tomas Osmeña nga maoy kaatbang ni Rama mas popular niadtong Pebrero sa miaging tuig apan anam-anam na kining nalupigan ni Rama.

Base sa survey nagkaanam kagamay ang “undecided” gikan sa 20 porsiyento ngadto na lang sa sayes porsiyento ug mao kini ang paspasan sa Team Rama sa pagkombinsir. Gihulagway ni Daluz nga ang survey results nga gihimo sa business group nga wala niya ibutyag, dili maglagyo kun itandi sa ilang kaugalingong survey.

Matud ni Daluz nga ang business group tingali gusto nga masayod kinsa kanila ni Rama ug Osmeña ang mas kusog aron maoy ilang paluyohan. (BANAT NEWS)