Ulitawo naligo sa sapa nalumos

CEBU, Philippines - Wala nay  kinabuhi  nga  gisakwat gikan sa ilawom sa tubig  ang  usa  ka ulitawo  kinsa  nalumos  samtang  naligo didto  sa  sapa  sa Sitio Morga, barangay Sudlon I, dakbayan sa Sugbo sa  miaging  hapon.

Ang  biktima  giila nga si Janno Mangubat, 18, molupyo sa sitio Sto. Niño,  barangay  Guizo, syudad sa Mandaue kinsa “on the job training”  sa usa  ka  kompaniya nga nahimutang  sa Sudlon.

Si  PO1John Errick Samosa, sa Homicide section,  sa Cebu City Police Office mibutyag  sa Banat News nga ang  biktima  kuyog  sa kauban  niini  sa trabaho  sa pagpangaligo  sa maong  sapa.

Apan  nakurat  na lang  ang  mga  kauban  niini  dihang  sa dayon  nilang  pamauli wala na  nila igkita  ang  biktima.

Si Emiliano  Roda  kinsa  maoy  labing suod nga  higala  niini  maoy  dali  nga  misawom sa tubig  diin  didto  nakita  niini  ang  wala  nay  kinabuhi  nga  biktima.

Gisakwat  dayon  kini  ni Roda  ngadto  sa daplin ug nanangpit  sila og barangay  tanod  kinsa  maoy  mipahibawo dayon  sa kapolisan.

Sigun ni PO1 Samosa , nga  bisan wala sila'y nakita nga mga samad sa lawas ni Mangubat apan  ilang  giawhag  sa tagtungod  nga  ipaubos  kini  sa autopsy  pagsiguro  sa  tinuod  nga  hinungdan  sa kamatayon niini. (/WC)   (BANAT NEWS)