3 ka gambling machine sakmit

CEBU, Philippines - Mikabat  sa tulo ka  mga  illegal  gambling machine  ang nasakmit  sa mga  kapolisan  sa ronda  nga ilang  gilusad  didto  sa sitio Kalapukan,  barangay  Carreta, dakbayan  sa Sugbo  sa miaging  buntag.

Si  PO2 Diosdado Parejas Jr.  ug  PO2 Renato  Jumawan  sa  Mabolo  Police  Station maoy  nanguna  sa team  nga  mironda sa maong  lugar  diin nasakmit  nila  ang  duha  ka  video karera  machine  ug  usa  ka  moli-moli  machine.

Matud  pa  ni  Parejas  nga  wala  sila’y  nadakpang  mga  tag-iya  sa maong  mga  kahimanan sa illegal  nga  sugal  sanglit  didto  kini  ibutang  sa  biniyaan  na  nga  payag  sa maong  lugar  ug  wala  usay  mga tawo  nga  mitug-an  sa ngalan  sa  mga  tag-iya  niini.

Ang maong  mga  kahimanan  anaa  karon sa  kustodiya sa kapolisan  sa  Mabolo  kinsa  maoy  mohatud  niini  ngadto  sa Cebu City  Police  Office  aron gub-on  ug  daoban.

Ang  kapolisan  sa  dakbayan  sa Sugbo  isog  nga  mipatuman  sa kampanya  batok  sa gidili  o  illegal  nga  sugal  agi  og  pagtuman  sa mando  sa labaw  nilang  buhatan  sa kaulohan. (BANAT NEWS)