Tulisan misakiyo’g dul-ang P100,000
CEBU, Philippines - Mikabat sa dul-ang P100,000 ang kantidad sa salapi ug mga butang gisakiyo sa w ala hiilhing mga tulisan nga mitulis sa usa ka seaman didto sa Dagohoy street, sitio San Antonio, barangay Apas ning dakbayan sa Sugbo sa miaging kaadlawon.
Ang biktima mao si Eric Suezo, 31, ulitawo, usa ka seaman ug molupyo sa maong lugar.
Si PO1 Eugene Raganas Jr. sa Mabolo Police Station mibutyag sa Banat News nga gikan sa IT Park, barangay Lahug ang biktima nga nagsakay sa kaugalingong awto niini uban sa iyang manghud nga lalaki.
Wala kini kalibotan nga gisundan sila sa duha ka tulisan nga nagsakay og motorsiklo ug sa paghunong nila tungod sa ilang balay sa dalan Dagohoy, nanaug usab sa ilang motorsiklo ang mga tulisan dayon gitionan sa ilang armas de fuego ang biktima.
Diha-diha gikuha sa mga tulisan ang mga butang sa biktima sulod sa iyang awto sama sa Ipad 4 Aple balor og P25,000, Laptop Ecee brand, P25,000; Samsung Tab, P12,000; 3 ka cell phone,P17,500; 2 ka branded bag, P15,000 ug cash nga P5,000.
Matud pa ni PO1 Raganas nga dihang mihana og sukol ang manghud sa biktima gitionan dayon kini sa armas ug gisumbag, hinuon wala pusila.
Human makuha ang kuwarta ug mga butang sa biktima, dali kaayong nakabiya ang mga tulisan sa maong lugar samtang ang biktima nga walay nahimo igo nalang sa pagsumbong sa maong hitabo ngadto sa kapolisan.
Sa pagkakaron padayon pang gipanid-an sa kapolisan ang maong mga tulisan. (BANAT NEWS)
- Latest
