Hepe sa PROBE wa mahulga sa bahad ni Osmeña

CEBU, Philippines - Wala mahadlok si Raquel Arce nga matangtang sa trabaho sa City Hall kun makadaog si Kongresista Tomas R. Osmeña pagkamayor sa dakbayan sa Sugbo sa eleksyon karong Mayo 13.

Matud ni Arce nga tahuron niya ang baruganan ni Osmeña nga tangtangon siya sa katungdanan kun siya ang modaug batok ni reelectionist Mayor Michael Rama.

Si Arce maoy hepe sa Prevention Restoration Order Beautification and Enhancement (Probe) nga kanhi mao ang SPEED, ingon man siya ang Market Administrator.

Nasuko si Osmeña kang Arce tungod kay matud pa isog kaayo kini nga mopatuman sa kamandoan kaniya ni Rama, usa niini ang pagpatuman sa clearing operation ingon man reblocking sa nasunog nga bahin sa Sitio Bato, Ermita.

Matud ni Osmeña nga si Rama mipatuman og clearing operation bisan og wala’y konsultasyon sa hingtungdang lumolupyo ug si Arce mipatuman usab dayon niini.

Si Arce nanghinaot nga unta og makahunahuna si Osmeña nga igo lang siya nga mituman sa kamandoan sa mayor isip usa ka kawani. (BANAT NEWS)