Yellow Submarine di lang kausa nabangga

CEBU, Philippines - Way plano si Lapulapu City Mayor Paz Radaza sa pagpatak-op sa negosyo sa Yellow Submarine nga nakaguba sa mga gasang ilawom sa kadagatan sa Kontiki Wall sa Brgy. Maribago dakbayan sa Lapulapu.

Matud pa ni Radaza nga dili ikalimod nga nakapakusog sa turismo ang maong kahimanan sa dagat.

Human gipakita kagahapon ni Andy Berame sakop sa Task Force Kalikasan ang mga kadaut nga namugna sa maong submarino ug ang nakitang garas sa lawas sa submarino nga nagpamatood nga midaro gyud kini sa gasang nakahukom si Radaza nga patubagon ang tagdumala sa maong kompanya.

Nagduda si Berame nga dili lang sa milabay’ng Abril 18 nahitabo ang pagdaro sa mga gasang mugna sa maong submarino tungod kay base sa nakita nilang garas sa kilid ug ilawom sa maong submarino makadaghan na kining nadasmag.

Buot ni Radaza nga adunay hugot nga patakaran nga sundon sa operasyon sa maong matang sa tourism attraction.

Samtang gipasalamatan ni Radaza si Satoshi Toyoda ang (Hapon nga nag-upload sa video sa internet) sa iyang pagpakabana sa kinaiyahan sa kadagatan sa Lapulapu.

Si Hembler Mendoza ang City Tourism officer miingon nga nakadawat siya og taho nga daghang turista ang nasagmuyo sa kalit nga paghunong sa operasyon sa Yellow Submarine tungod kay duna na sila’y reservation packages. (Bong Soriano/EIM) (BANAT NEWS)