Driver nga gipusil sa tulisan namatay gyud

CEBU, Philippines - Namatay gyud ang taxi driver nga gitulis ug gipusil sa duha ka batan-on  didto  sa  dakbayan  sa Lapulapu, sa miaging  Biyernes sa ala 1:30  sa kaadlawon.

 Matud pa ni SPO1 Elmer Canillo sa TRS sa kapolisan sa Lapulapu   nga didto  mamatay  sulod  sa tambalanan  si Jose Dino Rota Caberos, ang driver sa CITI taxi nga maoy biktima  sa panulis.

Apan  sa pagka-alas 4:30  sa hapon  sa maong  adlaw namatay   ang  biktima  gumikan sa samad pinusilan niini sa iyang ulo, apan sa wala pa kini mabugto-i sa ginhawa nakakompirmar pa kini sa hulagway sa duha ka mga tulisan nga gipakita kaniya sa kapolisan.

Sa maong hulagway positibong giila ni Caberos si Rene Jay Baroro Pelayo, 19,  ug Jap Marwin Cabalhug alyas “Kack Boy”, 18, pulos ulitawo nga  nagpuyo sa Sitio Carajay, Brgy. Gun-ob dakbayan sa Lapulapu nga maoy mitulis ug mipusil kaniya.

Gumikan niini mihimo dayon og hot pursuit operation ang kapolisan ug nasikop si Cabalhug, samtang si Pelayo mitahan sa iyang kaugalingon uban sa amahan niini ug sa uyoang polis nga si PO1 Aldrin Pelayo.

 Atol sa imbestigasyon sa kapolisan ang duha ka suspek  pulos miangkon  nga  silay  mipatay  sa biktima.

Si Pelayo samaran sa iyang tuong paa nga maoy timailhan sa samad niining naangkon sa dihang gibuak niini ang bintana sa taxi ug didto  sila  milusot dayong ikyas  gikan  sa dapit nga nahitaboan.

Matud pa ni SPO1 Canillo ,  nga  nakuhaan  nila   og hulagway sa duha ka suspek human nila  kini  masikop  dihang  nadakpan  sila  human  tulisa niini si Myco Apitong Maru, 20, ulitawo, nga taga  Purok Kaimito,  Brgy. Canjulao, dakbayan sa Lapulapu   sa miaging  semana.

Kasong Roberry with Homicide ang ipasaka sa kapolisan batok ni Pelayo ug Cabalhug  samtang  nagkagulkol na  sila  karon  sa prisohan. (WC) (BANAT NEWS)