Alayon ug LP diriyot magkarambola sa forum

CEBU, Philippines - Mga supporters sa Alayon Party ug Liberal Party diriyot magkarambola sa gipahigayong candidates open forum niadtong Sabado sa gabii diha sa covered court sa Santa Teresa de Avila Parish sa barangay Poblacion, dakbayan sa Talisay.

Ang maong candidates forum gipasiugdahan kini sa Talisay City, Cebu Brotherhood nga usa ka non-government organization ubos sa pagtabang sa Parish Pastoral Council ug Knights of Columbus.

Ang mitambong sa maong open forum nga kandidato sa Alayon si incumbent Mayor Socrates Fernandez lang tungod kay ang ubang kandidato dunay ubang mga importanteng lakaw.

Si Kongresista Eduardo Gullas kinsa kandidato sa pagka-mayor sa siyudad wala usab katambong tungod kay milarga kini ngadto sa Manila mitambong sa tigom sa Nacionalista Party.

Si kanhi Bise Mayor Aberdovey Belleza kinsa mikandidato isip independe ug magpapiling bise mayor ang mitambong.

Si Boyet Cortez kinsa magpapiling gobernador sa probinsiya isip independente kandidato ang mitambong sa forum.

Ang mga kandidato sa Liberal Party nga mitambong mao sila si Johny Delos Reyes kinsa magpapili pagka-mayor, incumbent councilor Romeo Villarante nga magpapiling bise mayor, incumbent councilors nga sila si Val Ylanan ug Danny Caballero, Tomas Embuscado, Cliffor Delos Reyes, Serenia Cabañero, Aldin Diaz ug Lee Consul.

Ang maong open forum nasama na hinuong candidates rally tungod kay walay napahigayong pangutana ngadto sa mga kandidato.

Ang mga kandidato tagsa-tagsang gihatagan og tulo ka minutos nga makasulti apan ang mga supporters sa isig ka habig magkayagaw og saba-saba ug dili na mamati sa moderator.

Kini misangpot hinuon sa pag-initay ug diriyot magkasinukmagay ang mga supporters sa Alayon ug LP sulod sa covered court tungod sa pasingitay sa usa’g-usa.

Paghuman og sulti ni Mayor Fernandez ang ubang supporter sa Alayon milakaw ug nagtapok diha sa atubangan sa simbahan.

Ang maong forum gisugdan mga alas 8:00 sa gabii ug mga alas 9:00 sa gabii nahuman kini.  Dihang nanggawas na gikan sa covered court ang tawo subling nagsininggitay og saway ang isi’g ka habig ug nagtinulisokay.

Aron nga dili moulbo og samot ang tensiyon si Mayor Fernandez mibarog uban sa mga supporters sa Alayon diha sa may agianan atubangan sa simbahan ug mipakalma sa mga tawo.

Ang beat patrol nga si PO1 Gerard Rollon maoy mihawan sa agianan ug namadlong sa ubang mga supporters aron malikayan ang gubot. Si Tony Redoble, Bise Presidente sa Talisay City, Cebu Brotherhood mihulagway nga ang maong open forum malampuson kung attendance ang hisgutan apan wala sila mag-expect nga lisod ang crowd control.

Matud ni Redoble nga wala manungha ang ubang kandidato hinungdan nga wala na lang nila ipadayon ang “question and answer” tungod kay dili makiangayon alang ngadto sa ubang mga kandidato. (BANAT NEWS)