Politiko nga manglansang sa lawas sa kahoy prisohon

CEBU, Philippines - Bug-at  ang  isilot nga pagkabilanggo  sa  mga  kandidato  nga  masakpang  mogamit  og lansang  sa pagpapilit  sa ilang  mga  campaign  material  sa  mga  punoan  sa kahoy  dinhi s a lalawigan.

Mao  kini  gibutyag  ni  Dr. Ed  Llamedo, tigpamaba  sa Department  of Environment  and  Natural  Resources (DENR)7  atol sa Association  of Government  Information  Officers( AGIO) Forum  nga  gipalanog  sa  DYMR  sa miaging  adlaw.

Matud  pa  ni  Llamedo  nga  sa pagkakaron  gimonitor  pag-ayo  sa ilang  mga  kawani  sa kabarangayan  ning  dakbayan  sa Sugbo  ug  sa tibuok  lalawigan  ang  mga  punoan  sa kahoy  nga  gipapitlan  og  mga  campaign material  sa  mga  lokal  ug  nasudnong  mga  kandidato.

 Hinuon  wala  pa  sila  makadawat  og  taho  nga  may  mga  kahoy  nga  gipataopan  og  lansang  aron  mopilit  ang  mga  poster  ug  mga  hulagway  sa  mga  kandidato.

Miingon  si  Llamedo nga  mag-antos  sa  silot  nga  pagkabilanggo  ang  masakpang  mopataop  og  lansang  sa  lawas  sa  bisan  unsang  matang  sa kahoy.

Kini  tungod  kay  gibalaod  na  nga  ang  kahoy  ug hayop,  sama  ra  og  kinabuhi   sa tawo  nga  kun  gidili  ang  pagdagmal  ug  pagpatay  sa tawo, gidili usab  ang  pagdagmal  sa kahoy  ug  sa hayop,  diin  ang  pagpataop  og  lansang  sa lawas  sa usa  ka kahoy  usa  ka  matang  sa pagdagmal  niini,  sumala  pa  ni  Llamedo.

Hinuon  matud pa    niya  nga kasagaran  sa  gigamit  sa  mga  kandidato  pagpaungot  sa ilang  mga  poster  ug  streamer  sa  mga  lawas  sa kahoy  mao  ang  “gewgaw”  matang  sa papilit  nga  mugna  sa tayubong  nga  gisagolan  og  tubig.

Ang  uban  pisi  ang  gigamit  nga  maoy  gigaid  sa lawas  sa kahoy  aron  nga  dili  matagak  ang  mga  gipamutang  nila  nga  mga  campaign  material. Matud  pa  ni  Llamedo  nga  basta  dili  lansang,  wala  nay  labot  ang DENR  niini, apan  ang  mga  kandidato  nga  magbuhat  sa ingon  dili  gihapon  makaikyas  sa silot  tungod  ang  Commission  on Elections (COMELEC)  higpit  usab  sa pagbantay  niini.

Ang  pagpamutang  og  mga  campaign  material  nga  gawa sa common  poster  area    usa  ka paglapas  sa balaod  nga  gipatuman  sa Comelec. Busa matud  pa  ni  Llamedo  nga  ang DENR  ug  Comelec  nag-alayon  aron masiguro  nga  dili  kapasipad-an  ang  mga  lawas  sa kahoy  gumikan sa midagsang  nga   mga  campaign  material  sa  mga  kandidato  alang  sa umaabot  nga piniliay.

Giawhag  usab  ni  Llamedo  ang  publiko  nga  ipadangat  sa ilang  buhatan  kun  may  masakpan  silang  politiko  o  mga tawo  nga  mopataop  og lansang  sa lawas  sa kakahoyan  ning  dakbayan  ug  sa tibuok  lalawigan. (BANAT NEWS)