Caravan sa Team Esgana gidugok sa tawo

CEBU, Philippines - Gidumog sa bagang duot sa mga tawo nga nanambong sa  caravan  sa Team Esgana ni mayoralty candidate Jose Titing Esgana ug sa  iyang running mate nga  si Kapitan  Romeo Batiancila  sa lungsod sa Sta Fe kagahapon sa hapon.

 Nunot niini gipahibawo sa tigpamaba sa Team Esgana nga  si Paulo Esgana nga gawas sa makabungog nga suporta sa mga Santafehanon, daghan na usab nga mga opisyal sa barangay ang mibiya  sa kampo ni mayor Jinnefer Ilustrisimo  ug milayat  na  ngadto  sa Team Esgana.

Matud ni Paulo  nga  sa napulo ka  barangay   sa Sta. Fe,    pito na ka barangay ang mipadayag og solidong suporta sa Esgana-Batanciala tandem.

Gani masaligon siya   nga sa mosunod pang mga adlaw   aduna pay ubang mga lider sa kasamtangang administrasyon sa  lungsod ang motapon na  usab sa ilang grupo tungod   kay  wala  na  kini  makauyon sa kampo sa mga Ilustrisimo.

Pipila  sa  mga barangay  kansang  mga  molupyo mipadayag  og  solidong suporta  sa Team Esgana   mao  ang  mga   barangay Talisay, barangay Okoy, barangay Maricaban, baangay Pooc, barangay Poblacion ug barangay Balidbid   lakip   na ang mga barangay sa Hilantagaan, Langub, Hagdan ug Bitoon.

Ang mga opisyal ug molupyo ning maong mga barangay mihulagway sa kasamtangang administrasyon nga napakyas   sa paghatag   sa  mga  batakang  serbisyo nga ilang  gikinahanglan  sama sa  pag-atiman  sa  maayong  panglawas, serbisyo  sa tubig ug sugang dagitabnon ilabi  na  didto sa isla sa Hilantagan.

Atol sa caravan kagahapon  si mayoralty candidate Esgana mipadayag   sa pag-atiman sa nag-unang panginahanglan sa  mga  molupyo  sa lungsod ug patas nga serbisyo kun buligan  siya  nga molampos  sa umaabot nga eleksyon. (BANAT NEWS)