Abogado sa CPA miinsister nga dili nila kinahanglang mananghid sa CH

CEBU, Philippines - Ang abogado sa Cebu Port Authority mipahibalo sa kadagkoan sa City Hall nga dili na kinahanglan nga sila molukat pa og construction permit kun motukod og bisan unsa nga infrastructure project sa luna nga iya sa CPA.

Si Atty. Yusop Uckung, acting deputy general manager ug manager sa legal affairs department sa Cebu Port Authority, mipadala og suwat ni City Engineer Kenneth Carmelita Enriquez human nga gipugngan ang ilang pagkoral sa luna dapit sa karaang Compania Maritima.

Matud ni Uckung nga ang balaud nga nagmugna sa CPA naglatid gyud nga dili na sila kinahanglang molukat pa og permit kun motukod og bisan unsa nga infrastructure project sulod sa pantalan. Si Mayor Michael Rama maoy nagmando sa pagpahunong pagkoral sa maong lugar nga kabahin kaniadto sa pantalan habig sa Compania Maritima kay buot usab apilon sa CPA pagkoral ang karaang karsada nga kabahin sa Quezon Boulevard.

Ang kaniadto dagat ug pantalan nga dunggoanan sa mga barko sa George & Peter Lines duol sa karaang building sa Compania Maritima nahimo na karon nga lapad nga hawan kay naapil kini sa reclamation project pagmugna og tunnel paingon sa Plaza Independencia.

Gusto ni Rama nga ang maong lapad nga kayutaan nga kanhi dunggoanan sa mga barko himoong parkinganan sa mga sakyanan niadtong mga tawo nga moadto sa City Hall.

Apan sa milabay’ng mga semana nabantayan ni Rama nga buot na mopabarug og haligi para koral ang CPA diha kilid sa Senior Citizens Park nga naglakip sa karaang karsada.  Gikwestyon ni Rama ang gihimo sa CPA kay matud pa niya ang karsada bisan og wala na kini karon agi-i og mga sakyanan apan dili maayo nga angkonon sa Cebu Port Authority.  (BANAT NEWS)