Cortes gibendisyonan sa charismatic

CEBU, Philippines - Usa  ka pundok sa charismatic  sa probinsiya sa Sugbo ang mipahigayon og pray over  ni independent gobernatorial candidate classmate Boyet Cortes didto sa Sto. Rosario Church ning dakbayan sa Sugbo kagahapon sa mga alas 10:00 pasado sa buntag.

Gibutyag ni Cortes atol sa interview sa mga tigbalita nga nalipay kaayo siya tungod kay wala siya magtuo nga bendisyonan sa charismatic group sa Sugbo ang iyang kandidatura.

Gitug-an ni Cortes nga igo lang gyud unta siya nahiagi   didto aron pagtambong og santos nga misa apan nakit-an siya sa pundok sa charismatic  ug didto gitanyagan siya nga ipaubos sa ilang pray over.

Giangkon ni Cortes nga garbo kaayo niya ang naangkon nga bendisyon  sa  iyang kandidatura sa maong  pundok  nga gituohan niya nga  labing  makapalig-on  sa iyang kampanya nunot ning nagkaduol nga eleksyon  sa Mayo.

Busa gipahibawo ni Cortes nga   preparado  na  kaayo  siya  sa bugnong  lugaynon   nga umaabot  uban  sa pagtuo  nga  lupigon  niya  ang  duha  ka kandidato  sa Liberal  Party   ug  One  Cebu  nga  pulos  niya  mga  kaatbang.

Ang  maong mga  kaatbang ni Cortes mao sila si Pablo John Garcia sa One Cebu ug Atty. Helario Junjun Davide III sa  LP.  (BANAT NEWS)