Kaplag 2013 adunay mga art exibit

CEBU, Philippines - Ang  kaabunda  sa kulturang Sugbuanon   nga  ubanan  sa nagkalainlaing  mga pista, nagpakita   sa  kaadunahan niini sa  mga  kabiling  relihiyoso  ug  kulturanhon. Ang Fiesta Señor ug ang  Sinulog Festival matag  ikatulong Domingo  sa  buwan  sa Enero  nagpadayon  sa  pagdani  og  mga  langyaw  ug  lokal  nga  mga  turista. Gani  ang  selebrasyon  niining  tuiga  nakadani  og mga upat  ka  milyon  ka  mga deboto  kinsa  mihalad  og  pagsimba  sa  Sto. Niño,  diin  may  kaliboan  usab  mismo  nga  Sugboanon  nga  mitambong  sa labing  dako  nga  kasaulogan  sa pista nga  mao  ang  Sinulog.

Karong adlawa  Abril 27, laing  pista  ang  saulogon  sa makausa pa  sa Harang Dakbayan  sa habagatan  nga  mao  ang  Pista  sa Kaplag  nga  gituohan  usab  nga  modani  og  kaliboan  ka  mga deboto  sa Balaang  Bata  sa Basilica del Santo Niño. Nagkalain-laing  kalihokan  ang  giandam  atol  niining  ika-448  ka tuig  nga  kasaulogan  sa  Kaplag  o  ang  higayon  sa pagkaplag  sa imahe  ni Sto. Niño.

Usa  sa labing gipaabot  nga kalihokan  sa nahisgutang  selebrasyon  mao ang   art exibit  ni  artist Rev. Fr. Dominador Besares, OSA  didto  sa SM City  Cebu Art Center.  Ang tema  sa exibit  mao  ang “KAPLAG- Nagladlad sa Dagway ni Hesus Pinaagi  sa Arte  sa Tuig  sa Pagtuo 2013”. Buksan  kini  sa Abril 28  o ugma  sa alas 6:00  sa gabii. Atol  sa pagbukas  ang OSA  Novice  maoy  manguna  sa pag-ampo  nga sundan  usab  sa pagpaila   sa maong  art exibit  pinaagi  ni Fray Louie   Nacorda, usa  ka  lay  nga  kadugtong  sa Discalced Augustinian (OAD). Human  sa maong  introduction., si Fr. Besares, OSA mopadayag  usab  sa iyang  mga  pasalamat. Sa pormal  nga  pagbukas sa exibit, si  His Excellency Most Rev. Jose S. Palma D.D.  maoy manguna  sa pagputol  sa ribbon  ug  mobendisyon  niini  ug  abagan  siya  ni Very Rev. Fr. Eusebio B. Berdon, OSA.Prior Provincial sa Lalawigan  sa Cebu sa  Order  of Saint Augustine  ug  Madame Nena Gullas.

Ang  katibuk-ang  tumong  sa maong  art exibit mao  ang  pagpalig-on  sa katawhan  nga  magmainampoon  kang Sto. Niño. Ang  mga  debuho  sa Balaang  Bata  magpasundayag  sa usa  ka  gamhanan  kaayong panag-uban  sa  gugma  ug  pagtuo. Kun   sud-ongon  ang  mga  debuho, matag  usa  labing  molig-on  sa  iyang  pagtuo   kang Sto. Niño. Tungod  niini  ang  exibit  maoy  hingpit nga  tubag  sa pagsaulog  sa Simbahan  sa  Tuig sa Pagtuo. Matag  usa  gidapit  sa  pag-adto  sa maong  lugar  gikan  sa Abril 28 ngadto sa Mayo 12, 2013. (BANAT NEWS)