Lagtang Public Market himuong extension sa TCC

CEBU, Philippines - Ang merkado sa Lagtang gikatakdang himuong extension sa Talisay City College kung makabalhin na ang mga vendors matud ni Kongresista Eduardo Gullas sa unang distrito sa probinsiya.

Si Gullas mibutyag kagahapon sa mga tigbalita nga dihang gihatagan siya kaniadto og P104 milyones nga budget ni kanhi Presidente Gloria Macapagal Arroyo wala kini maghisgot kung asa gamiton ang maong kwarta.

Matud sa kongresista nga aron dili mahimong “white elephant” ang merkado sa Lagtang himuon kining extension sa TCC aron butangan sa itanyag nga Technological Vocational  (TechVoc) program. Ang kongresista duna na nay draft sa Memorandum of Agreement (MOA) tali sa TESDA ug nagkaestorya na sila sa telepono sa kalihim sa TESDA nga si Joey Villanueva kabahin sa iyang plano.

Ang mga short term courses sa TechVoc maglangkob sa shielded metal art welding; housekeeping; bread and pastry technology; commercial cooking; bartending; food and beverages service; consumer electronics; computer hardware; Pinoy hilot ug pagpangihaw.

Sa laing bahin, gipasusi na ang edipisyo sa daang merkado sa Tabunok aron masusi kung luwas pa kining gamiton, maayong drainage system, ug i-apply pa pagbalik ang linya sa kuryente ug tubig maong miawhag siya sa mga vendors nga magpaabot lang og gamay.

Susihon pa usab kung dili ba kalapasan sa Comelec ban ang pagpagawas og pundo alang niini ug dunay ordinansa o resolusyon sa konseho bahin niini. (Brenda D. Batuto/EIM) (BANAT NEWS)