2 notadong kawatan nadakpan

CEBU, Philippines - Duha ka giingong notadong kawatan ang nasikop kagahapon sa buntag sa kapolisan diha sa sitio Mananga I, barangay Tabunok, dakbayan sa Talisay.

Ang nasikop mao si Louie Diaz, 20, residente sa maong dapit kinsa dunay warrant of arrest sa kasong theft nga giluwatan ni Regional Trial Court (RTC) Judge Generosa Labra sa Branch 23 niadtong Enero 15, 2013.

Laing nasikop mao si Isagani Villanueva, 20, taga lungsod sa Minglanilla kinsa naembargohan og usa ka kalibre .38 nga revolver ug pito ka mga buhing bala sa samang kalibre.

Sila si PO3 Ferdinand Pablo, PO3 Benedicto Lasque ug PO2 Roy Lofranco ang mianha sa sitio  Mananga aron sa pag-serve sa warrant of arrest batok kang Diaz apan nakit-an nila si Villanueva nga naglingkod diha daplin sa  karsada.

Giingong midagan si Villanueva pagkakita sa mga polis hinungdan nga gigukod kini ug dihang na-corner giingong giibot niini ang armas sa hawak maong gipasalbahan siya ni Lasque.

Si Villanueva gidemalas tungod kay napandol ug natumba diha sa karsada sa iyang pagdagan ug nalagpot ang pusil hinungdan sa grabeng pangos diha sa iyang agtang ug gidala dayon sa Talisay City District Hospital.

Si Pablo nga nahinabi sa mga tigbalita nagkanayon nga si Diaz notado na nga kawatan ug nadakpan na kaniadto apan nakabuhi tungod kay niadtong higayona menor de edad pa kini. (BANAT NEWS)