Eddiegul di kinaiya ang mag-relax panahon sa eleksyon

CEBU, Philippines - Bisan sa iyang ka-beterano sa politika, giangkon ni Kongresista Eduardo Gullas sa unang distrito sa probinsiya sa Sugbo nga bation gyud siya og kahadlok ug dili mag-relax-relax panahon sa eleksyon.

Kagahapon sa buntag usa sa mga gihisgutan sa gipahigayong press conference diha sa buhatan ni Gullas sa University of the Visayas, dakbayan sa Sugbo ang kabahin sa giingong pangangkon sa iyang kaatbang nga si Johnny Delos Reyes sa pagkamayor sa Talisay nga mas taas kini og rating kun itandi kang Gullas.

“In the first place kang kinsa man nang survey?” pangutana pang Gullas.

Siya miingon nga kinahanglang ‘kasaligang grupo’ ang mag-survey aron makuha ang saktong tingog sa katawhan.

“I did not run to loose, I run to win although I run scared. I’d never run nga kanang relax-relax lang,” matud pa niya.

Gihimong sanglitanan ni Gullas mao ang 2001 elections diin una siyang nagpapiling mayor sa Talisay City atbang kang incumbent Talisay City Mayor Socrates Fernandez.

Matud niya gibati siya og kahadlok kaniadto ug aron mapalig-on ang iyang kandidatora misuroy siya sa mga balay-balay sa siyudad ug nagpaila sa mga Talisaynon. Niadtong higayona si Gullas maoy incumbent congressman sa maong distrito.

Usa sa gitutokan nga isyu karon sa kaatbang ni Gullas mao ang kabahin sa pagpasira sa merkado sa Tabunok ug ang pagpabalik sa terminal sa traysikol.

Apan matud ni Gullas nga ang usa ka lider kinahanglan usab maminaw sa katawhan ug karong iyaha na kining nahibaw-an milihok siya aron kini makurihian.

Matud ni Gullas isip usa ka kongresista duna siya’y daghang gimbuhaton ngadto sa Kongreso ug sa distrito nga iyang gihuptan. Ug karong magpapili siyang mayor sa siyudad karon pa niya mahibaw-i ang mga hangyo sa drayber.

Si Gullas gikatakdang makigtigom sa mga vendor karong adlawa (Miyerkules) kay buot niyang mangonsulta sa yangungo sa mga vendors. (BANAT NEWS)