P2.5 milyones danyos sa pabrikang nasunog

CEBU, Philippines - Mikabat sa P2.5 milyones ang gibanabanang danyos sa naugdaw  sa sunog  nga pabrika sa tsinilas sa dalan Mabugat, barangay Tabok, dakbayan sa Mandaue  sa miaging kaadlawon  matud  pa  ni SFO1 Cefriano Codilla, imbestigador sa Bureau of Fire Protection (BFP) sa maong dakbayan  kagahapon.

Si   SFO1 Codilla  mibutyag  sa  Banat News  nga ang nasunog nga pabrika sa tsinilas mao ang Cermatex Factory Inc. nga gipanag-iya sa magpapatigayon  nga  si Joseph Yu.

Sumala  ni SFO1 Codilla nga nagsugod ang kayo sa sulod sa   pabrika  sa tsinilas   nga nahimutangan  sa gidan-ok  ug  gipanapok  nga  mga biya   nga  mga  goma  sa tsinilas.

Midugang  siya   nga gikan  sa maong  dapit dali nga mikatap ang kayo sa tibuok  pabrika   apan  ila  kining  napawong  human sa  30 minutos.

Matud pa ni SFO1 Codilla nga ilang gipaubos sa Task Force Alpha ang maong sunog   ug  miabag  usab ang  ubang  mga  kabomberohan sa Metro Cebu areas.

Lakip sa  mitabang kanila sa pagpawong sa kayo mao ang kabomberohan sa dakbayan sa Sugbo, Cordova, dakbayan sa Lapulapu, Consolacion, Chinese Filipino Volunteer Fire Brigade, Emergency Rescue Unit Foundation  (ERUF) ug uban pa.

Si SFO1 Codilla miingon nga wala nila matataw ang hinungdan sa kalit nga pag-ulbo sa kayo sanglit nagpadayon pa ang ilang imbestigasyon ug wala’y gikatahong naangol o kinabuhing nakalas sa maong sunog. (/WC) (BANAT BALITA)