Masuso napaig, 237 balay naugdaw

CEBU, Philippines - Abo nang naabtan sa amahan ang iyang onse pa ka bulan nga anak nga babaye human naapil sa dakong sunog sa kabalayan diha sa sitio Bato sa barangay Ermita sa siyudad sa Sugbo pasado alas-10 sa miaging gabii.

Ang maong sunog milamoy sa 237 ka balay nga gipuy-an sa 462 ka pamilya o 2,076 ka tawo ang nawad-an og kapuy-an sa sunog  sumala pa sa pangulo sa Department of Social Welfare and Services sa siyudad sa Sugbu nga si Ester Concha.

Ang namatay mao si Mary Claire Flores, onse ka bulan nga masuso human wala masalbar sa iyang mga igsuon nga nag-iyahay og panagan palayo sa sunog.

Matud pa ni Charlot Crispe nga nahinabi sa Banat News samtang naglingkod-lingkod siya sa lantay nakadungog kini og usa ka sipang buto gikan sa taas nga bahin sa panimalay sa mga Flores.

Pila ka minutos ang milabay giingong iyang nabantayan nga nagkalayo na ang kwarto sa ibabaw nga bahin sa balay sa mga Flores. Dali untang giadto ni Crispe ang nasunog nga bahin sa balay aron pangitaon ang masuso apan dako na kaayo ang kalayo.

Ang amahan sa bata nga si Torribio Flores daling miabot gikan nagpalit og diaper ug gisuwayan pag-abli ang lawak apan naka-lock kini ug dako na usab ang kalayo.

“Didto na iyang lawas sa ubos duol sa bungbong sa balay possible natagak pagkahunlak sa flooring sa second floor o ba kaha nilayat gikan sa taas,”matud ni FO3 Lowel Opolentisima, ang fire investigator sa maong kaso.

“Sa pagkakaron wala pa namo siya makit-i kay nawala man to gabii ug kalit mura’g naratol amo pang balikon,” dugang pa ni Opolentisima.

Ang alarma giisa ngadto sa Task Force Alpha hinungdan nga miresponde ang tanang fire fighting units sa Metro Cebu ug mga silingang mga lungsod.

Nakontrolar ang sunog paglabay sa alas 11:27 sa gabii gikan nadawat ang alarma sa alas 10:20. Ang kalayo hingpit napawong pagka-alas 2:09 sa kaadlawon kagahapon.

Wala pa hinuon nakompirmar sa kabomberohan ang mga pamahayag ni Crispe. Atol ning pagsulat sa balita, wala pa igkita si Torribio human migawas ang mga balita nga gituyo niini ang pagsunog sa ilang balay.

Ang igsuon sa bata nga si Arcie, 20, mihimakak sa mga pasangil nga gituyo ang pagsunog. "Wa gyud na tuyoa. Kinsa gud buanga ang magtuyo og sunog sa ilang panimalay, syempre sakit sa among bahin kay bunso gud to namo ‘nya namatay pa gyud," pasabot pa ni Arcie.

Sa pakighinabi sa Banat News ni Cebu City Fire Marshall William Tacaldo gibana-bana niyang mokabat sa usa ka milyon ka pesos ang danyos sa maong sunog tungod kay sagad sa kabalayan ginama sa mixed-materials. Wala pa usab matino kung unsay sinugdanan sa sunog apan sumala pa ni Opolentisima, naglisod gyud sila sa pag-atraka tungod sa kahagip-ot sa dalan, pagsamok-samok sa mga tawo ug nagdasok nga mga butang sa agianan.

Ang ubang bombero mitabok pa sa sapa samtang ang uban diha na nangagi sa mga atop aron maabot ang fire scene tungod kay gisumpay-sumpay nalang ang hose gikan sa mga supertankers sa gawas. (Lesley Caminade-Vestil, Ria Mae Booc ug Genevieve Dejito,CNU Intern) (BANAT BALITA)