Senior na-heat stroke patay

 CEBU, Philippines - Gilangaw na ang patay’ng lawas sa usa ka senior citizen  nga  gituohang na-heat stroke ug namatay didto sa Sitio Kanlalay, barangay Cabangbang, lungsod sa Bantayan isla sa Bantayan   sa miaging  hapon.

Ang  biktima mao si Leopoldo Quijano, 77, minyo nga  taga Sitio Veto, barangay Kangka-ebi, lungsod  sa  Bantayan .

 Si PO2 Vicente Chavez sa Bantayan Police  Station  mibutyag  sa Banat News    nga  ang biktima  mibiya sa  ilang  balay  sayo  sa buntag  ug  wala  na  kini  mahiuli  hangtud  sa pagka-gabii.

Ang mga kabanay   nga naanad  sa  kinaiya  sa biktima,  wala  lang  usab  mangita  niini sa ilang  pagtuo  nga  miadto  ra  kini  sa iyang  mga  kabanay

Apan   nakurat  na lang  sila  dihang usa ka  nangumpay  og pagkaon  sa hayop mipahibawo  kanila pagka  sunod  buntag  kalabot  sa iyang  nakita  nga  ang  biktima  nagbuy-od    sa kalibonan  nga  patay  na  ug  gitapokan  na  sa mga langaw.

Ila dayong  gipahibawo  sa kapolisan  sa lungsod  kinsa  milihok  usab  dayon  sa pagrespondi  sa maong  alarma.

Kauban  sa kapolisan ang municipal health officer nga si Dra. Liza Rivera,  gisusi  ang  lawas  sa biktima  ug ilang gituohan  nga nabiktima  gumikan sa hilabihang  pagkabuwad  niini  sa naglagiting  nga kainit  sa adlaw   nahiagom    kini sa   heat-stroke   nga  maoy  hinungdan  sa  pagkalipong  niini  ug  nakuyapan.

Tungod  kay  walay  nakatabang,  nadayonan  kini  sa pagkamatay  sa kalibonan.  (BANAT NEWS)