Driver gituok patay

CEBU, Philippines - Patay na nga napalgan  ang  usa ka drayber    nga gituohang gituok- patay ug gilabay didto sa barangay Binaliw, siyudad sa Danao niadtong Biyernes sa alas 4:00 sa hapon.

Ang   biktima  mao si Marjon Calvo Canedo, 25, ulitawo, taga Camalig-Bato, barangay  Tabuk, sa maong  dakbayan  ug  usa  ka drayber sa  habal- habal

Subay sa spot report nga gipadangat sa operations branch sa Cebu Police Provincial Office (CPPO) pinaagi ni PO3 Romano Morales, nasayran  nga ang duha ka mga bata nga nanguha  og  prutas maoy nakadiskobri sa patay’ng lawas sa biktima   nga  nagbay-ad  sa kalibonan kansang  liog gihiktan og  yellow nga pisi.

Ila  dayon  kining   gi-report  ngadto   sa kapolisan ug  dihang  gisusi  sa  mga otoridad  nasuta  nga  ang  yellow  nga pisi  sa  liog  sa biktima  maoy  gituok  kaniya  ug  dihang  namatay  gisalibay  kini  sa kalibonan  sa maong lugar.

Ang kapolisan sa dakbayan  sa Danao  padayon pang  mipalawom  sa ilang  imbistigasyon sa maong hitabo aron pag-ila sa mga mamumuno ug pagtumbok sa motibo sa maong krimen. (BANAT NEWS)