Duha patay sa bangga sa tabogon

CEBU, Philippines - Duha ang patay apil niini ang 15- anyos nga dalagita sa panagbangga sa duha ka sakyanan diha sa barangay Libjo lungsod sa Tabogon niadtong Huwebes sa ala 1:00 sa hapon.

Ang unang sakyanan mao ang Mitsubishi delivery closed- van nga gimaneho ni Bernardito Olita, 34, taga Abuyog, Leyte apan kasamtangang nagpuyo sa Banghitaw Banban Bogo City.

Samtang ang laing sakyanan mao ang Mitsubishi Adventure nga gimaneho ni Natividad Alota Pestaño,52 ,  taga lungsod sa San Remegio ug maoy usa sa namatay.

Samtang ang laing namatay mao ang kinse anyos nga si Angelina Alota Vilacampa nga anak sa laing pasahero nga si Analyn Alota Vilacampa. Matud ni PO2 Steve Book sa Tabogon Police Station dihang nahinabi sa Banat News nag-parking ang delivery van nga naghatud og bino sa usa ka tindahan sa maong dapit.

Sumala pa nga naatol usab niini ang pag-agi sa gisakyan sa mga namatay ug wala mabantayi ni Pestaño ang gi-parking nga  delivery van ug tungod sa kakusog sa impact nalahos kini sa poste sa kuryente.

Gitabang dayun ang mga biktima ug gihatud sa tambalanan apan namatay ang drayber nga si Pestaño ug ang 15-anyos nga si Villacampa samtang naangol ang inahan sa bata.

Nahibaw-an sa imbistigasyon sa kapulisan nga ang drayber nga si Natividad nakatulog samtang nagmaneho ug nakaingon sa pagbangga. (Darrel A. Carumba/EIM) (BANAT BALITA)