LP candidates sa 4th District giproklamar ni P.Noy
CEBU, Philippines - Pormal nga giproklamar ni Presidente Benigno Aquino III ang lokal nga kandidato sa Liberal Party sa ikaupat nga distrito sa lalawigan sa Sugbo nga gipangulohan ni Bogo City Mayor Celestino “Junie†Martinez III.
Hinoon ang kandidato sa pagka-kongresista mao ang anak ni Junie nga si kanhi mayor Celestino “Tining†Martinez III.
Nitambong usab sila si kanhi konsehal sa dakbayan sa Sugbo, Hilario Davide III, nga kandidato pagka-gobernador ug kasamtangang gobernador, Agnes Magpale, nga kandidato pagkabise-gobernador; ilang kandidato sa pagka-bokal nga sila si Jose Layon ug Raffy Luche ug mga kandidato sa kalungsuran.
Gibana-banang miabot sa 15 mil ang nanambong sa kalihukan gikan sa dakbayan sa Bogo ug mga lungsod sa Daanbantayan, Medellin, San Remegio, Tabuelan, Tabogon, Santa Fe, Bantayan ug Madridejos.
Si Aquino unang gikataho nga mangulo sa pagsubo sa bag-ong Bogo City Hall apan wala na nahinayon sanglit ang kalihukan gipahigayon na niadtong Lunes ug ang pagbukas na lang sa marker niini ang gipahigayon kagahapon sa wala pa nahiabot ang presidente.
Si Mayor Martinez ug ubang opisyal sa dakbayan ang gikuyogan ni Senador Aquilino “Koko†Pimentel III sa pagbukas sa marker.
Sa wala pa nahidangat si Aquino, sila si Pimentel, kanhi senador Jamby Madrigal, Bam Aquino nga girepresentahan sa asawa nga si Timmy; Riza Hontiveros nga girepresentahan sa pag-umangkon nga si Luis; ug Grace Poe nga girepresentahan sa anak nga si Bryan ang nakapadangat na sa ilang mensahe dayun biya alang sa laing kalihukan sa Sugbo kagahapon.
Sa iyang mensahe, gipahibawo ni Mayor Martinez si Aquino nga mokabat sa 4 mil ka mga benepisyaryo sa Pantawid Pamilyang Pilipino Program (4Ps) ang nanambong usab aron personal nga mopasalamat kaniya. (Gregg M. Rubio/EIM) (BANAT BALITA)
- Latest
