Bata nalumos sa balde

CEBU, Philippines - Patay nang nakit-an ang kapin sa usa ka tuig pa nga bata nga gituohang nalumos sa balde nga puno sa tubig diha sa ilang pinuy-anan sa barangay Basdiot lungsod sa Moalboal niadtong Huwebes sa alas 4:00 sa hapon.

Ang biktima mao si Trisibbel Manosos, kapin sa tuig ang panuigon ug molupyo sa maong lugar.

Matud ni PO2 John Robert Sacan sa Moalboal Police Station dihang nahinabi sa Banat News ang bata ug yaya niini nga si Sally Fuentes mao lay nahabilin sa balay tungod kay nitrabaho ang ginikanan niini.

Gikatahong nakatulog ang nagbantay ug nataligam-an ang bata ug wala mabantayi nga nakasulod kini sa kasilyas ug didto nagduwa- duwa sa balde nga puno sa tubig.

Gituohang midung-aw ang bata sa tubig ug natuwad nga nag-una ang ulo  sa ilawom ug wala na makabarog pa tungod kay naisa ang duha niini  ka tiil hinungdan sa pagkalumos niini. Dihang nakamatikod ang yaya nga wala sa iyang duol ang bata dali dayon kini niyang gipangita ug didto niya kini nakit-an sa kasilyas sa sulod sa balde ug wala nay panimuot.

Dali dayun kini nangayo og tabang apan patay na kini ug giingong gidala na lang sa usa ka punerarya.

Ang kapolisan mipasidaan sa publiko nga adunay mga batang nag-edad og 5-anyos paubos nga kinahanglang bantayan sila og maayo tungod kay dili kalikayang lihokan ang mga bata.

Kinahanglan usab nga dili matulog kung nagmata pa ang gibantayang bata aron mabantayan ang mga lihok niini ug malayo sa disgrasya.  (/EIM) (BANAT BALITA)