Kasong rape with homicide gihapak ngadto sa construction worker

CEBU, Philippines - Kasong rape with homicide ang gipasaka sa kapolisan batok sa  usa ka construction worker nga suspetsado sa pagpanglugos ug pagpatay sa usa ka 9- anyos nga batang babaye nga napalgan sa kalibonan sa purok Gabi, barangay Gun-ob, dakbayan sa Lapulapu. Si PO2 Winston Ybañez, imbestigador sa Homicide Section sa Lapulapu City Police Office nga nahinabi sa Banat News miingon nga ilang gipasakaan og kaso si Junel Dusaban, 21, lumad nga taga barangay Cabcaban sa lungsod sa Barili .

Sumala pa sa autopsy nga gihimo sa PNP Crime Laboratory napahimuslan gyud ang biktima.

Si Ybañez  miingon nga ang suspetsado maoy gitumbok sa duha ka minor de edad nga katapusang nakit-an nga gikauban sa biktima nga nanglakaw paingon  sa kalibonan.

Dugang pa niya nga ang suspetsado nga ilang gisukitsukit miangkon hinuon nga mikuyog niya ang biktima sa pagpaingon sa kalibunan dihang iyang giingnan nga hatagan og kwarta.

Sumala pa nga mikisikisi ang bata maong gipangusgan og maayo  sa suspek ug gitabonan ang baba niini apan namatay kini. (/EIM) (BANAT BALITA)