Kapolisan blangko pa sa mipusil sa magtiayon

CEBU, Philippines -Nagpabilin pa gihapong blangko ang kapolisan  sa pag-ila sa kriminal nga misaka sa  balay   ug  mipatay sa bana sa magtiayong di kasal sa barangay Babag, dakbayan sa Lapulapu sa miaging gabii.

Si PO2 Winston Ybañez nga nahinabi sa Banat News sa follow-up nga gihimo kagahapon miingon nga  ang mga kabanay sa namatay nga si Karl Philip Mangubat, 24, nga  usa ka computer technician,  wala  gayuy nasayran  kinsay mipatay  sa   biktima.

Matud pa ni PO2 Ybañez nga ang mga ginikanan sa biktima  mibutyag  nga  wala  sila  makamatngon nga  may  kontra ang  ilang anak.

Matud pa  ni PO2 Ybañez  nga walay  pagtuo   ang  mga  kabanay  sa  biktima nga love triangle  ang  hinungdan  sa maong  pagpamusil.

Midugang  siya  nga  si Gina Ochea Bertudaso, 24 ,  ug kapuyo sa namatay  miingon  nga  dugay-dugay  na silang nagtipon ug wala silay  gikaaway  kay  ang  biktima  nga  si Mangubat  mahigalaon  kaayo.

Sa nasayran nga  ang  magtiayon  didto  sa  sulod  sa ilang  balay  dihang  kalit  nga  misaka  ang  wala hiilhing   kriminal  ug gipamusil   sila.

Si PO2 Ybañez miingon nga si Mangubat  nasabak  sa ulo  ug  uban pang bahin  sa lawas     nga   maoy nakaingon sa hinanali niining kamatayon.

Samtang  si  Bertudaso  nasabak  usab  sa  tiil ug dali kining gidala sa ilang mga sakop sa pamilya ngadto sa Lapulapu City District Hospital   apan gibalhin usab  dayon  kini  ngadto   sa Vicente Sotto Memorial Medical Center sa dakbayan sa Sugbo.

Padayon  pang  gipanid-an  sa  kapolisan   ang mipatay  sa  biktima.(/WC) (BANAT BALITA)