Trak ug kargang coco lumber naugdaw

CEBU, Philippines - Kapin usa ka milyon ka pesos ang danyos sa nasunog nga trak de karga nga puno sa karga nga coco lumber samtang kini nagbiyahi sa highway sa barangay Dakit sa lungsod sa Barili niadtong Miyerkules sa alas 6:30 sa gabii.

Ang nasunog mao ang Fuso Fighter nga dunay plaka nga RDZ-994 nga iya sa Cercher Construction ug gipanag-iya ni Cheryl Fuentes nga taga Kalunasan siyudad sa Sugbo nga gimaneho sa naila lang sa pangalan nga Jojo Embalsado,30.

Matud ni SPO1 Henie Aspera sa Barili Police Station dihang nahinabi sa Banat News gikan sa Moalboal ug paingon unta sa syudad sa Sugbo ang trak  apan pag-abot sa maong lugar namatikdan sa drayber nga nag-aso ang luyo nga bahin sa iyang sakyanan.

Apan dihang siya mihunong ug misusi nakurat siya nga nagkayo na ang iyang kargamento hinungdan nga gitabangan nila og sablig og tubig sa iyang helper nga si Rolly Dayoday apan wala nila kini mapawong maong nagpatabang sila sa mga polis ug bombero apan naugdaw gyud kini. (/EIM)  (BANAT NEWS)